‘କୌଣସି ଟାର୍ଗେଟ୍ ଆମ ସାମର୍ଥ୍ୟ ବାହାରେ ନୁହେଁ’; ପାକିସ୍ତାନକୁ ବାୟୁସେନା ମୁଖ୍ୟଙ୍କ କଡ଼ା ଚେତାବନୀ

ଭାରତୀୟ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶାଲ୍ ଏପି ସିଂହ କହିଛନ୍ତି, କୌଣସି ଟାର୍ଗେଟ୍ ଭାରତୀୟ ବାୟୁସେନାର ପହଞ୍ଚ ବାହାରେ ନାହିଁ । ଅପରେସନ୍ ସିନ୍ଦୂର ସମୟରେ ଭାରତୀୟ ବାୟୁସେନା ଯେଉଁଭଳି ଭାବେ ସଠିକ୍ ଆକ୍ରମଣ କରିଥିଲା, ତାହା ଏହି କ୍ଷମତାକୁ ପ୍ରମାଣିତ କରିଛି । 

 ଭାରତୀୟ ବାୟୁସେନାର ଶକ୍ତି ଓ ଆକ୍ରମଣ କ୍ଷମତାକୁ ପ୍ରମାଣିତ କରିଛି ଅପରେସନ୍ ସିନ୍ଦୂର । ଭାରତୀୟ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶାଲ୍ ଏପି ସିଂହ କହିଛନ୍ତି, କୌଣସି ଟାର୍ଗେଟ୍ ଭାରତୀୟ ବାୟୁସେନାର ପହଞ୍ଚ ବାହାରେ ନାହିଁ । ଅପରେସନ୍ ସିନ୍ଦୂର ସମୟରେ ଭାରତୀୟ ବାୟୁସେନା ଯେଉଁଭଳି ଭାବେ ସଠିକ୍ ଆକ୍ରମଣ କରିଥିଲା, ତାହା ଏହି କ୍ଷମତାକୁ ପ୍ରମାଣିତ କରିଛି । ତାଙ୍କର ଏହି ବୟାନକୁ ପାକିସ୍ତାନ ପାଇଁ ଏକ କଡ଼ା ବାର୍ତ୍ତା ଭାବେ ଦେଖାଯାଉଛି ।

ଏକ ସାକ୍ଷାତକାରରେ ବାୟୁସେନା ମୁଖ୍ୟ ଏପି ସିଂହ କହିଛନ୍ତି ଯେ, ଅପରେସନ୍ ସିନ୍ଦୂର ଭାରତୀୟ ବାୟୁସେନାର କ୍ଷମତାକୁ ଆଧାର କରି ପ୍ରସ୍ତୁତ ରଣନୀତିର ସଫଳତାକୁ ପ୍ରମାଣିତ କରିଛି । ପଶ୍ଚିମ ସୀମାରେ ପ୍ରାୟ ୧୨୦୦ କିଲୋମିଟର ଅଞ୍ଚଳରେ ଏବଂ ୨୦୦ କିଲୋମିଟର ଭିତର ପର୍ଯ୍ୟନ୍ତ ଭାରତୀୟ ବାୟୁସେନା ସଠିକ୍ ଆକ୍ରମଣ କରିଥିଲା । ଯେକୌଣସି ସଙ୍କଟ ସମୟରେ ତୁରନ୍ତ ପଦକ୍ଷେପ ନେବା ସହ ଶତ୍ରୁପକ୍ଷକୁ ଆକ୍ରମଣରୁ ନିବୃତ୍ତ ରଖିବାରେ ବାୟୁସେନାର ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ସେ କହିଛନ୍ତି ।

ଅପରେସନ୍ ସିନ୍ଦୂରରୁ ମିଳିଥିବା ଶିକ୍ଷା ସମ୍ପର୍କରେ ଏପି ସିଂହ କହିଛନ୍ତି ଯେ, ଏହି ସଫଳତାର ଅର୍ଥ ନୁହେଁ ଯେ ଭାରତ ଏହିଠାରେ ଅଟକି ରହିବ । ବରଂ ନିଜର ସାମରିକ କ୍ଷମତାକୁ ଆହୁରି ମଜଭୁତ କରିବା ସହ ଏହାର ବିସ୍ତାର କରିବା ଆବଶ୍ୟକ । ଶତ୍ରୁପକ୍ଷ ନିଜ ରଣନୀତି ବଦଳାଇଲେ ତାହା ଅନୁସାରେ ତୁରନ୍ତ ନିଜକୁ ପ୍ରସ୍ତୁତ କରିବା ଦରକାର । ଗୋଟିଏ ମାଧ୍ୟମ ଉପରେ ନିର୍ଭର ନକରି ବିଭିନ୍ନ ପ୍ରକାରର ଯୁଦ୍ଧ କୌଶଳ ଓ ସାଧନ ବ୍ୟବହାର କରିବାର କ୍ଷମତା ଭାରତକୁ ଅଧିକ ଲଚିଳା କରିଥାଏ । ଏହି କାରଣରୁ ପରିସ୍ଥିତି ଅନୁସାରେ ଜବାବ ଦେବା ସମ୍ଭବ ହୋଇଥିଲା ଏବଂ ସଂଘର୍ଷକୁ ଆଗକୁ ବଢ଼ିବାରୁ ରୋକାଯାଇପାରିଥିଲା ବୋଲି ସେ କହିଛନ୍ତି ।

ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ଭାରତ ଗତବର୍ଷ ମେ’ ମାସରେ ଅପରେସନ୍ ସିନ୍ଦୂର ଆରମ୍ଭ କରିଥିଲା । ଏହି ଅଭିଯାନରେ ପାକିସ୍ତାନ ଏବଂ ପାକିସ୍ତାନ ଅଧିକୃତ ଅଞ୍ଚଳରେ ଥିବା ଆତଙ୍କବାଦୀ ଭିତ୍ତିଭୂମିକୁ ଟାର୍ଗେଟ୍ କରି ସଠିକ୍ ଆକ୍ରମଣ କରାଯାଇଥିଲା । ଏହି ଅଭିଯାନରେ ସ୍ୱଦେଶୀ ଜ୍ଞାନକୌଶଳରେ ନିର୍ମିତ କିଛି ଅସ୍ତ୍ରଶସ୍ତ୍ର ଉତ୍କୃଷ୍ଟ ପ୍ରଦର୍ଶନ କରିଥିବା ବାୟୁସେନା ମୁଖ୍ୟ କହିଛନ୍ତି । ଶତ୍ରୁପକ୍ଷର ଅଞ୍ଚଳ ଭିତରକୁ ପ୍ରବେଶ କରି ଟାର୍ଗେଟ୍‌କୁ ନଷ୍ଟ କରିବା ସହ ଏହି ଅଭିଯାନରେ ଅନ୍ୟ କୌଣସି ବ୍ୟକ୍ତି କିମ୍ବା ସମ୍ପତ୍ତିର କ୍ଷତି ନକରିବା ପାଇଁ ବାୟୁସେନା ନିଜର ପ୍ରତିବଦ୍ଧତା ପାଳନ କରିଥିବା ସେ ଦାବି କରିଛନ୍ତି । ଏପି ସିଂହ କହିଛନ୍ତି ଯେ, ଅପରେସନ୍ ସିନ୍ଦୂର ଭାରତ ଚୟନ କରିଥିବା ସାମରିକ ରଣନୀତି ସଠିକ୍ ବୋଲି ପ୍ରମାଣିତ କରିଛି । ଦେଶର ଆବଶ୍ୟକତା ପଡ଼ିଲେ ଭାରତୀୟ ବାୟୁସେନା ଆଗକୁ ଆହୁରି ଦ୍ରୁତ, ସଠିକ୍ ଓ ନିର୍ଣ୍ଣାୟକ ଭାବେ କାର୍ଯ୍ୟାନୁଷ୍ଠାନ ନେବା ପାଇଁ ନିଜ କ୍ଷମତାକୁ ବଢ଼ାଇବା ଜାରି ରଖିବ ।