ଠକେଇ ଅଭିଯୋଗ : ଶେଖ୍ ହାସିନାଙ୍କ ଝିଅ ସାଇମା ଡବ୍ଲୁଏଚ୍ଓ ଆଞ୍ଚଳିକ ନିର୍ଦ୍ଦେଶକ ପଦରୁ ଇସ୍ତଫା

ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କ ଝିଅ ସାଇମା ୱାଜେଦ ବିଶ୍ୱ ସ୍ୱାସ୍ଥ୍ୟ ସଂଗଠନ(ଡବ୍ଲୁଏଚ୍ଓ)ର ଦକ୍ଷିଣ-ପୂର୍ବ ଏସିଆ କ୍ଷେତ୍ରୀୟ ନିର୍ଦ୍ଦେଶକ ପଦରୁ ଇସ୍ତଫା ଦେଇଛନ୍ତି 

ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କ ଝିଅ ସାଇମା ୱାଜେଦ ବିଶ୍ୱ ସ୍ୱାସ୍ଥ୍ୟ ସଂଗଠନ(ଡବ୍ଲୁଏଚ୍ଓ)ର ଦକ୍ଷିଣ-ପୂର୍ବ ଏସିଆ କ୍ଷେତ୍ରୀୟ ନିର୍ଦ୍ଦେଶକ ପଦରୁ ଇସ୍ତଫା ଦେଇଛନ୍ତି । ଜାତିସଂଘ ଏଜେନ୍ସି ଏବଂ ବାଂଲାଦେଶୀ ଅଧିକାରୀଙ୍କ ଦ୍ୱାରା ଠକେଇ ଏବଂ ଜାଲିଆତିର ତଦନ୍ତ ମଧ୍ୟରେ ସେ ନିଜର ଇସ୍ତଫା ପ୍ରଦାନ କରିଛନ୍ତି। ଗତ ବର୍ଷଠାରୁ ସାଇମାଙ୍କୁ ସଂଗଠନ ଦ୍ୱାରା ଅବୈତନିକ ପ୍ରଶାସନିକ ଛୁଟିରେ ରଖାଯାଇଥିଲା। ସେ ୨୦୨୪ରୁ ପାଞ୍ଚ ବର୍ଷ ପାଇଁ ଆଞ୍ଚଳିକ ନିର୍ଦ୍ଦେଶକ ପଦ ଗ୍ରହଣ କରିଥିଲେ।ଡବ୍ଲୁଏଚ୍ଓର ମହାନିର୍ଦ୍ଦେଶକ ଟେଡ୍ରୋସ୍ ଆଧାନମ୍ ଘେବ୍ରେୟସସ୍‌ଙ୍କୁ ପଠାଯାଇଥିବା ତାଙ୍କ ଇସ୍ତଫା ପତ୍ରରେ ସାଇମା ଲେଖିଛନ୍ତି, ତାଙ୍କୁ ତାଙ୍କର ଦାୟିତ୍ୱ ନିର୍ବାହ କରିବାରୁ ବାରଣ କରାଯିବା ପରେ ସେ ଟେଡ୍ରୋସ୍‌ଙ୍କ ନେତୃତ୍ୱ ଉପରେ ବିଶ୍ୱାସ ହରାଇଛନ୍ତି। ସେ ତାଙ୍କ ଅଞ୍ଚଳର ଦେଶଗୁଡ଼ିକର ଅତ୍ୟନ୍ତ ନିଷ୍ଠାର ସହିତ ସେବା କରିଛନ୍ତି କିନ୍ତୁ ସଂଗଠନର ନେତୃତ୍ୱ ଉପରେ ଆଉ ତାଙ୍କର ଭରସା ନାହିଁ।

ମୋ ଅଞ୍ଚଳର ଦେଶଗୁଡ଼ିକର ସେବା କରିବା ପାଇଁ ମୁଁ ନିର୍ବାଚିତ ହୋଇଥିଲି, ଏହି କାମଟି ମୁଁ ସମ୍ପୂର୍ଣ୍ଣ ସଚ୍ଚୋଟତାର ସହିତ କରିଥିଲି। ମୋତେ ସବୁବେଳେ ମୋର କର୍ତ୍ତବ୍ୟ ସଠିକ୍ ଭାବରେ ସମ୍ପାଦନ କରିବାରୁ ବାରଣ କରାଯାଇଛି, ତେଣୁ ମୁଁ ଡବ୍ଲୁଏଚ୍ଓରେ ଆପଣଙ୍କ ନେତୃତ୍ୱ ଉପରେ ବିଶ୍ୱାସ ହରାଇଛି।
ସାଇମା କହିଛନ୍ତି, ମୋତେ ଅବୈତନିକ ଛୁଟିରେ ପଠାଇବାର ନିଷ୍ପତ୍ତି ଯୋଗୁଁ ମୋର ଆର୍ଥିକ ପରିସ୍ଥିତି ବହୁତ ଖରାପ ହୋଇଛି। ମୁଁ ଗୋଟିଏ ବର୍ଷ ପାଇଁ ବିନା ଦରମାରେ ରହିଛି। ଏହି ପରିସ୍ଥିତିରେ, ମୁଁ ଇସ୍ତଫା ଦେବାକୁ ନିଷ୍ପତ୍ତି ନେଉଛି। ବାଂଲାଦେଶ ଦୁର୍ନୀତି ନିବାରଣ କମିସନ ୨୦୨୫ ମାର୍ଚ୍ଚ ମାସରେ ଠକେଇ ଏବଂ ଜାଲିଆତି ଅଭିଯୋଗ ଆଣିବା ପରେ ୱାଜେଦଙ୍କୁ ପ୍ରଥମେ ଜୁଲାଇ ୨୦୨୫ରେ ଛୁଟିରେ ପଠାଯାଇଥିଲା।

ତାଙ୍କ ଆଇନଜୀବୀଙ୍କ ଦ୍ୱାରା ଡବ୍ଲୁଏଚ୍ଓକୁ ପଠାଯାଇଥିବା ଏକ ଚିଠି ଅନୁଯାୟୀ, ଏଜେନ୍ସି ତାଙ୍କ ବିରୋଧରେ ତାଙ୍କର ଚୀନ୍‌ ଯାତ୍ରା ସହିତ ଜଡିତ ଆର୍ଥିକ ଠକେଇ ଏବଂ ତାଙ୍କ ଶିକ୍ଷାଗତ ଯୋଗ୍ୟତା ବିଷୟରେ ମିଥ୍ୟା ସୂଚନା ପ୍ରଦାନ କରିବାର ଅଭିଯୋଗ ଆଣିଛି। ତେବେ ସାଇମା ଏହି ଅଭିଯୋଗଗୁଡ଼ିକୁ ଅସ୍ୱୀକାର କରିଛନ୍ତି। ସେ କହିଛନ୍ତି, ବାଂଲାଦେଶରେ ଅଟିଜିମ୍ ଉପରେ ତାଙ୍କର କାର୍ଯ୍ୟ ପାଇଁ ତାଙ୍କୁ ସମ୍ମାନଜନକ ଡକ୍ଟରେଟ୍ ଉପାଧି ମିଳିଛି। ସେ ଏହି ଯୋଗ୍ୟତା ବିଷୟରେ ଟେଡ୍ରୋସ୍‌ଙ୍କୁ ଜଣାଇଛନ୍ତି।
ଡବ୍ଲୁଏଚ୍ଓ ମଧ୍ୟ ଅଭିଯୋଗ କରିଛି ଯେ ସେ ବାଂଲାଦେଶରେ ବେଆଇନ ଭାବରେ ଏକ ଜମି ଅଧିଗ୍ରହଣ କରିଥିଲେ। ତେବେ ଡବ୍ଲୁଏଚ୍ଓରେ ଯୋଗଦେବା ପୂର୍ବରୁ ସେ ଏହି ସମ୍ପତ୍ତି ଅଧିଗ୍ରହଣ କରିଥିବା ଦାବି କରିଛନ୍ତି। ବାଂଲାଦେଶୀ ଆଇନ ଅନୁଯାୟୀ ସେ ଏହାର ହକଦାର ଥିଲେ, ଯାହା ତାଙ୍କ ଜେଜେବାପା ଏବଂ ବାଂଲାଦେଶର ପ୍ରତିଷ୍ଠାତା ନେତା ଶେଖ ମୁଜିବୁର ରହମାନଙ୍କ ପରିବାରର ଥିଲା।

ଡବ୍ଲୁଏଚ୍ଓ ଏବେ ସାଇମାଙ୍କ ପରେ କିଏ ଏହି ପଦବୀରେ ରହିବେ ସେନେଇ ଚୟନ ପ୍ରକ୍ରିୟା ଆରମ୍ଭ କରିବେ। ଅକ୍ଟୋବରରେ ନାମାଙ୍କନ ଆଶା କରାଯାଉଛି, ଡିସେମ୍ବରରେ ଆବେଦନଗୁଡ଼ିକର ଯାଞ୍ଚ୍ କରାଯିବ ଏବଂ ଜାନୁଆରି ୨୪ ରେ ନିର୍ବାଚନ ହୋଇପାରେ।