ଜେଡିୟୁରୁ ବିଦା ହେବା ପରେ ଅନନ୍ତ ସିଂହଙ୍କ ବଡ଼ ଗେମ୍‌ପ୍ଲାନ୍‌: ନିଜ ଦଳ ଗଢ଼ି ନୀତୀଶଙ୍କୁ ଦେବେ ଚ୍ୟାଲେଞ୍ଜ୍‌

ଅନନ୍ତ ସିଂହ ନିଜ ଘନିଷ୍ଠ ସମର୍ଥକଙ୍କ ସହ ଆଲୋଚନା ବେଳେ ନୂଆ ଦଳ ଗଠନ କରିବାକୁ କହିଛନ୍ତି। ତାଙ୍କ କହିବା ଅନୁସାରେ, ରାଜନୈତିକ ଦଳ ତାଙ୍କୁ ବାରମ୍ବାର ବାହାର କରିଛନ୍ତି, କିନ୍ତୁ ମୋକାମାର ଜନତା କେବେ ତାଙ୍କୁ ପ୍ରତ୍ୟାଖ୍ୟାନ କରିନାହାନ୍ତି। 

ବିହାର ରାଜନୀତିରେ ପୁଣି ହଲଚଲ। ଜେଡିୟୁରୁ ବହିଷ୍କୃତ ହେବା ପରେ ନୂଆ ରାଜନୈତିକ ଇନିଂସ ଆରମ୍ଭ କରିବାକୁ ପ୍ରସ୍ତୁତ ହେଉଛନ୍ତି ମୋକାମାର ବାହୁବଳୀ ବିଧାୟକ ଅନନ୍ତ ସିଂହ। ଏଥର ଅନ୍ୟ କୌଣସି ଦଳରେ ସାମିଲ ନହୋଇ ନିଜର ଏକ ନୂଆ ରାଜନୈତିକ ଦଳ ଗଠନ କରିବାକୁ ସେ ସଙ୍କେତ ଦେଇଛନ୍ତି। ଫଳରେ ବିହାର ରାଜନୀତିରେ ନୂଆ ସମୀକରଣ ସୃଷ୍ଟି ହେବା ନେଇ ଚର୍ଚ୍ଚା ଜୋର ଧରିଛି।

ସୂଚନା ଅନୁସାରେ, ଅନନ୍ତ ସିଂହ ନିଜ ଘନିଷ୍ଠ ସମର୍ଥକଙ୍କ ସହ ଆଲୋଚନା ବେଳେ ନୂଆ ଦଳ ଗଠନ କରିବାକୁ କହିଛନ୍ତି। ତାଙ୍କ କହିବା ଅନୁସାରେ, ରାଜନୈତିକ ଦଳ ତାଙ୍କୁ ବାରମ୍ବାର ବାହାର କରିଛନ୍ତି, କିନ୍ତୁ ମୋକାମାର ଜନତା କେବେ ତାଙ୍କୁ ପ୍ରତ୍ୟାଖ୍ୟାନ କରିନାହାନ୍ତି। ତେଣୁ ଜନତାଙ୍କ ଭରସାରେ ନିଜର ରାଜନୈତିକ ଶକ୍ତି ଗଢ଼ିବାକୁ ସେ ଚାହୁଁଛନ୍ତି। ଏହି ନୂଆ ଦଳରେ ତାଙ୍କ ପତ୍ନୀ ତଥା ପୂର୍ବତନ ବିଧାୟିକା ନୀଲମ ଦେବୀଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିପାରେ। ତେବେ ଦଳ ଗଠନ ନେଇ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା ହୋଇନାହିଁ।

ପଟନା ସ୍ନାତକ ବିଧାନ ପରିଷଦ ନିର୍ବାଚନରେ ଜେଡିୟୁ ପ୍ରାର୍ଥୀ ନୀରଜ କୁମାରଙ୍କ ବିରୋଧରେ ଜନ ସୁରାଜ ପ୍ରାର୍ଥୀ ଅନୁଜ ସିଂହଙ୍କୁ ସମର୍ଥନ କରିଥିଲେ ଅନନ୍ତ। ଏହାପରେ ଦଳବିରୋଧୀ କାର୍ଯ୍ୟକଳାପ ଅଭିଯୋଗରେ ଜେଡିୟୁ ରାଜ୍ୟ ସଭାପତି ଉମେଶ କୁଶୱାହା ଅନନ୍ତ ଓ ତାଙ୍କ ପତ୍ନୀଙ୍କୁ ୬ ବର୍ଷ ପାଇଁ ବହିଷ୍କାର କରିଛନ୍ତି। ଏଥିସହ ଅନନ୍ତଙ୍କ ବିଧାୟକ ପଦ ରଦ୍ଦ କରିବାକୁ ବିଧାନସଭା ବାଚସ୍ପତିଙ୍କୁ ସୁପାରିସ କରାଯାଇଛି। 

ଅନ୍ୟପଟେ ମୋକାମାରେ ଅନନ୍ତ ସିଂହଙ୍କ ବ୍ୟକ୍ତିଗତ ଜନାଧାର ବେଶ୍ ମଜଭୁତ। ପୂର୍ବରୁ ସେ ସ୍ୱାଧୀନ ପ୍ରାର୍ଥୀ ଭାବେ ମଧ୍ୟ ବିଜୟୀ ହୋଇଛନ୍ତି। ତେଣୁ ନୂଆ ଦଳ ଗଠନ କଲେ ମୋକାମା ସମେତ ପଟନା ଓ ଆଖପାଖ ଅଞ୍ଚଳର ରାଜନୈତିକ ସମୀକରଣ ବଦଳିପାରେ। ଏବେ ସମସ୍ତଙ୍କ ନଜର ଅକ୍ଟୋବର ୨୭ରେ ପ୍ରକାଶ ପାଇବାକୁ ଥିବା ବିଧାନ ପରିଷଦ ନିର୍ବାଚନ ଫଳାଫଳ ଉପରେ। ଏହାପରେ ଅନନ୍ତ ସିଂହଙ୍କ ପରବର୍ତ୍ତୀ ରାଜନୈତିକ ପଦକ୍ଷେପ ସ୍ପଷ୍ଟ ହୋଇପାରେ।