ବେଙ୍ଗାଲୁରୁରୁ ପର୍ତ୍ତୁଗାଲ୍: ୟୁରୋପୀୟ ଫୁଟ୍ବଲ୍ରେ ଚମକୁଛନ୍ତି ୧୮ ବର୍ଷୀୟା ରିନ୍ଶା ମରିୟମ୍
ରିନ୍ଶାଙ୍କ ଏହି ସଫଳତା ପଛରେ ରହିଛି କଠିନ ପରିଶ୍ରମ, ନିଷ୍ଠା ଓ ଫୁଟ୍ବଲ୍ ପ୍ରତି ଗଭୀର ଭଲପାଇବା। ୨୦୨୩-୨୪ ଫୁଟ୍ବଲ୍ ଋତୁରେ ସେ ବେଙ୍ଗାଲୁରୁ ଏଫ୍ସି ପକ୍ଷରୁ ସୁପର ଡିଭିଜନ୍ରେ ଖେଳି ନିଜ ଦକ୍ଷତା ପ୍ରଦର୍ଶନ କରିଥିଲେ।
ଭାରତୀୟ ମହିଳା ଫୁଟ୍ବଲ୍ରେ ନୂଆ ଆଶା ସଞ୍ଚାର କରିଛନ୍ତି କେରଳର ୧୮ ବର୍ଷୀୟା ଯୁବ ଫୁଟ୍ବଲର୍ ରିନ୍ଶା ମରିୟମ୍। ବେଙ୍ଗାଲୁରୁରୁ ନିଜ ଫୁଟ୍ବଲ୍ ଯାତ୍ରାକୁ ଆଗକୁ ବଢ଼ାଇଥିବା ରିନ୍ଶା ଏବେ ୟୁରୋପୀୟ ଫୁଟ୍ବଲ୍ରେ ନିଜ ପ୍ରତିଭାର ପରିଚୟ ଦେଉଛନ୍ତି। ପର୍ତ୍ତୁଗାଲ୍ର ପ୍ରତିଷ୍ଠିତ କ୍ଲବ୍ ଡି ଆଲବର୍ଗାରିଆର ୧୯ ବର୍ଷରୁ କମ୍ ମହିଳା ଦଳରେ ସ୍ଥାନ ପାଇ ସେ ନିଜ କ୍ୟାରିୟର୍ରେ ଏକ ନୂଆ ଅଧ୍ୟାୟ ଆରମ୍ଭ କରିଛନ୍ତି।
ରିନ୍ଶାଙ୍କ ଏହି ସଫଳତା ପଛରେ ରହିଛି କଠିନ ପରିଶ୍ରମ, ନିଷ୍ଠା ଓ ଫୁଟ୍ବଲ୍ ପ୍ରତି ଗଭୀର ଭଲପାଇବା। ୨୦୨୩-୨୪ ଫୁଟ୍ବଲ୍ ଋତୁରେ ସେ ବେଙ୍ଗାଲୁରୁ ଏଫ୍ସି ପକ୍ଷରୁ ସୁପର ଡିଭିଜନ୍ରେ ଖେଳି ନିଜ ଦକ୍ଷତା ପ୍ରଦର୍ଶନ କରିଥିଲେ। ଏହାପରେ ତାଙ୍କ ଫୁଟ୍ବଲ୍ ଜୀବନରେ ଆସିଥିଲା ବଡ଼ ପରିବର୍ତ୍ତନ। ଭାରତୀୟ ଫୁଟ୍ବଲ୍ରୁ ୟୁରୋପୀୟ ଫୁଟ୍ବଲ୍ ପର୍ଯ୍ୟନ୍ତ ପହଞ୍ଚିବାରେ ସେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି।
ଗତ ସେପ୍ଟେମ୍ବର ମାସରେ ପର୍ତ୍ତୁଗିଜ୍ କ୍ଲବ୍ର ଚଳିତ ଋତୁର ପ୍ରଥମ ମ୍ୟାଚ୍ରେ ରିଓ ଟିଣ୍ଟୋ ବିପକ୍ଷରେ ପଦାର୍ପଣ କରିଥିଲେ ରିନ୍ଶା। ଏହାପରେ ଶନିବାର ଲିସବନ୍ରେ ବେନ୍ଫିକା ବିପକ୍ଷରେ ୧୯ ବର୍ଷରୁ କମ୍ ଲିଗ୍ର ଚତୁର୍ଥ ରାଉଣ୍ଡ ମ୍ୟାଚ୍ରେ ମଧ୍ୟ ଖେଳିବାର ସୁଯୋଗ ପାଇଥିଲେ। ୟୁରୋପର ଏଭଳି ପ୍ରତିଯୋଗିତାରେ ଖେଳିବା ତାଙ୍କ ପାଇଁ ବଡ଼ ଅଭିଜ୍ଞତା ସାବ୍ୟସ୍ତ ହେଉଛି।
ରିନ୍ଶାଙ୍କ ବାପା ରସିଦ ଏମ୍ପିଙ୍କ ସୂଚନା ଅନୁସାରେ, ଗତ ଅଢ଼େଇ ବର୍ଷ ଧରି ତାଙ୍କ ଝିଅ ପର୍ତ୍ତୁଗାଲ୍ରେ ରହି ପାଠପଢ଼ା ସହ ଫୁଟ୍ବଲ୍ ଅଭ୍ୟାସ ଜାରି ରଖିଛନ୍ତି। ଶିକ୍ଷା ଓ ଖେଳ ମଧ୍ୟରେ ସନ୍ତୁଳନ ରକ୍ଷା କରି ସେ ନିଜ ସ୍ୱପ୍ନ ପୂରଣ ଦିଗରେ ଆଗେଇ ଚାଲିଛନ୍ତି। ରିନ୍ଶାଙ୍କ ଏହି ଯାତ୍ରା ଭାରତର ଅନେକ ଯୁବତୀଙ୍କ ପାଇଁ ପ୍ରେରଣା ପାଲଟିପାରେ। ଆଗାମୀ ଦିନରେ ୟୁରୋପୀୟ ଫୁଟ୍ବଲ୍ରେ ଆହୁରି ସଫଳତା ହାସଲ କରି ଭାରତୀୟ ମହିଳା ଫୁଟ୍ବଲ୍କୁ ନୂଆ ପରିଚୟ ଦେବାର ସମ୍ଭାବନା ସୃଷ୍ଟି କରିଛନ୍ତି ଏହି ଯୁବ ପ୍ରତିଭା।
What's Your Reaction?
