ଭାରତ ଉପରେ ବଢୁଛି ବିଶ୍ୱର ଭରସା ! 

ବିଶେଷ କରି ଶକ୍ତି ଏବଂ ଅତ୍ୟାବଶ୍ୟକ ସାମଗ୍ରୀର ଯୋଗାଣ ଉପରେ ପ୍ରବଳ ଚାପ ରହିଛି ଏବଂ ଗତ କିଛି ମାସ ଧରି ଏହି ସ୍ଥିତି ଜାରି ରହିଛି । ବିଶେଷ କରି ଏପ୍ରିଲରୁ ଜୁନ୍ ତ୍ରୈମାସିକ ବିଶ୍ୱ ଅର୍ଥନୀତି ପାଇଁ ସବୁଠାରୁ କଷ୍ଟକର ସମୟ ଥିଲା । 

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମୁମ୍ବାଇରେ ‘ଗ୍ଲୋବାଲ ଫିନଟେକ ଫେଷ୍ଟ୍’ର ଦଶମ ସଂସ୍କରଣକୁ ଆନୁଷ୍ଠାନିକ ଭାବେ ଉଦଘାଟନ କରିଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ଦେଶର ଅର୍ଥନୀତି ଏବଂ ବର୍ତ୍ତମାନର ବିଶ୍ୱ ପରିସ୍ଥିତି ଉପରେ ନିଜର ମତ ରଖି କହିଛନ୍ତି ଯେ, ସାରା ବିଶ୍ୱ ଏବେ ଏକ ସଂଘର୍ଷ ଏବଂ ଅନିଶ୍ଚିତତା ଦେଇ ଗତି କରୁଛି । ବିଶେଷ କରି ଶକ୍ତି ଏବଂ ଅତ୍ୟାବଶ୍ୟକ ସାମଗ୍ରୀର ଯୋଗାଣ ଉପରେ ପ୍ରବଳ ଚାପ ରହିଛି ଏବଂ ଗତ କିଛି ମାସ ଧରି ଏହି ସ୍ଥିତି ଜାରି ରହିଛି । ବିଶେଷ କରି ଏପ୍ରିଲରୁ ଜୁନ୍ ତ୍ରୈମାସିକ ବିଶ୍ୱ ଅର୍ଥନୀତି ପାଇଁ ସବୁଠାରୁ କଷ୍ଟକର ସମୟ ଥିଲା । ମାତ୍ର ଏଭଳି ପ୍ରତିକୂଳ ପରିସ୍ଥିତି ସତ୍ତ୍ୱେ ଭାରତ ଯେତେବେଳେ ୭.୮ ପ୍ରତିଶତ ଅଭିବୃଦ୍ଧି ହାର ସହିତ ଆଗକୁ ବଢ଼ୁଛି, ସେତେବେଳେ ସାରା ବିଶ୍ୱରେ ଭାରତ ପ୍ରତି ଏକ ନୂଆ ଭରସା ସୃଷ୍ଟି ହେଉଛି ବୋଲି ପ୍ରଧାନମନ୍ତ୍ରୀ କହିଛନ୍ତି ।

ପ୍ରଧାନମନ୍ତ୍ରୀ ଭାରତର ସୋଭେରେନ୍ ରେଟିଂ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ଜାପାନର ଏକ କ୍ରେଡିଟ୍ ରେଟିଂ ଏଜେନ୍ସି ଭାରତର ରେଟିଂକୁ ଅପଗ୍ରେଡ୍ କରି ‘ଏ’ ଶ୍ରେଣୀଭୁକ୍ତ କରିଛି। ଏହି ସଫଳତା ନିଶ୍ଚିତ ଭାବେ ଦେଶ ପାଇଁ ଏକ ଖୁସିର ଖବର। ଏହି ଅବସରରେ ମୋଦୀ ୨୦୨୪ ମସିହାରେ ନିଜର ‘ହ୍ୟାଟ୍ରିକ୍’ ସମ୍ପର୍କରେ ମଧ୍ୟ ଚର୍ଚ୍ଚା କରିଥିଲେ। ସେ କହିଥିଲେ ଯେ ଚଳିତ ବର୍ଷ ଦୁଇଟି ହ୍ୟାଟ୍ରିକ୍ ସଫଳତା ମିଳିଛି, ଗୋଟିଏ ହେଉଛି ଲଗାତାର ତୃତୀୟ ଥର ପାଇଁ ସରକାର ଗଠନ କରିବା ଏବଂ ଅନ୍ୟଟି ହେଉଛି ଲଗାତାର ତୃତୀୟ ଥର ପାଇଁ ଏହି ଗ୍ଲୋବାଲ ଫିନଟେକ ଫେଷ୍ଟରେ ସାମିଲ ହେବା। ଏହି ଉତ୍ସବରେ ସେ ଲଗାତାର ଯୋଗ ଦେବା ଦର୍ଶାଉଛି ଯେ ଭାରତର ବିକାଶରେ ଫିନଟେକ କ୍ଷେତ୍ରର ଭୂମିକା କେତେ ଗୁରୁତ୍ୱପୂର୍ଣ୍ଣ ।

ଫିନଟେକ ଫେଷ୍ଟରେ ଉପସ୍ଥିତ ଥିବା ଯୁବପିଢ଼ିଙ୍କୁ ଉତ୍ସାହିତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଏଠାକୁ ଆସିବା ପରେ ସେ ଅଧିକରୁ ଅଧିକ ଯୁବ ଶକ୍ତିଙ୍କୁ ଦେଖିବାକୁ ପାଉଛନ୍ତି ଏବଂ ସେମାନଙ୍କ ଠାରୁ ଏକ ନୂତନ ଶକ୍ତି ମିଳୁଛି। ଭାରତର ବିକାଶ ଯାତ୍ରାରେ ଫିନଟେକ କ୍ଷେତ୍ରର ଅବଦାନକୁ ଅଣଦେଖା କରାଯାଇପାରିବ ନାହିଁ। ଆଗାମୀ ଦିନରେ ଏହି କ୍ଷେତ୍ରରେ ସମ୍ଭାବନାର ପରିସର ଆହୁରି ବୃଦ୍ଧି ପାଇବ ବୋଲି ସେ ଆଶା ପ୍ରକାଶ କରିଛନ୍ତି। ଏହି କାର୍ଯ୍ୟକ୍ରମରେ ଦେଶ ତଥା ବିଦେଶରୁ ଅନେକ ଅତିଥି ଏବଂ ପ୍ରତିନିଧିମାନେ ଯୋଗ ଦେଇଥିବା ବେଳେ ପ୍ରଧାନମନ୍ତ୍ରୀ ସେମାନଙ୍କ ସହ ଆଲୋଚନା କରି ଫିନଟେକ ଦୁନିଆର ନୂଆ ନୂଆ ଉଦ୍ଭାବନ ଏବଂ ପ୍ରଯୁକ୍ତିବିଦ୍ୟା ବିଷୟରେ ଅବଗତ ହୋଇଥିଲେ ।