ଉଜ୍ଜୟିନୀର ଶାହି ମସଜିଦର ଏକ ଅଂଶ ଭାଙ୍ଗିବା ପାଇଁ କାର୍ଯ୍ୟାନୁଷ୍ଠାନ : ପୁଲିସ ପ୍ରତିବାଦକାରୀ ମୁହାଁମୁହିଁ

ମଧ୍ୟପ୍ରଦେଶର ଉଜ୍ଜୟିନୀରେ ଶାହି ମସଜିଦର ଏକ ଅଂଶକୁ ରାସ୍ତା ପ୍ରଶସ୍ତୀକରଣ ପାଇଁ ଭଙ୍ଗାଯିବା ଯୋଜନା ଥିବା ସ୍ଥାନରେ ପ୍ରତିବାଦକାରୀଙ୍କ ପକ୍ଷରୁ ପୁଲିସ ଉପରକୁ ପଥର ଫିଙ୍ଗା ହୋଇଛି। 

ମଧ୍ୟପ୍ରଦେଶର ଉଜ୍ଜୟିନୀରେ ଶାହି ମସଜିଦର ଏକ ଅଂଶକୁ ରାସ୍ତା ପ୍ରଶସ୍ତୀକରଣ ପାଇଁ ଭଙ୍ଗାଯିବା ଯୋଜନା ଥିବା ସ୍ଥାନରେ ପ୍ରତିବାଦକାରୀଙ୍କ ପକ୍ଷରୁ ପୁଲିସ ଉପରକୁ ପଥର ଫିଙ୍ଗା ହୋଇଛି। ଭିଡ଼କୁ ନିୟନ୍ତ୍ରଣ କରିବା ପାଇଁ ପୁଲିସ ଲୁହବୁହା ଗ୍ୟାସ୍ ପ୍ରୟୋଗ କରିଛି। ଘଟଣାସ୍ଥଳରେ ରାପିଡ୍ ଆକ୍ସନ ଫୋର୍ସ କର୍ମଚାରୀମାନେ ଉପସ୍ଥିତ ଅଛନ୍ତି। ଉଜ୍ଜୟିନୀରେ ସିଂହସ୍ଥ କୁମ୍ଭମେଳା ୨୦୨୮ ପାଇଁ ପ୍ରସ୍ତୁତିର ଅଂଶ ଭାବରେ ରାସ୍ତା ପ୍ରଶସ୍ତୀକରଣକୁ ନେଇ ଏକ ବିବାଦ ଦେଖାଦେଇଛି। କୁମ୍ଭମେଳା ୨୭ ମାର୍ଚ୍ଚ ୨୦୨୮ରୁ ୨୭ ମେ’ ପର୍ଯ୍ୟନ୍ତ ଅନୁଷ୍ଠିତ ହେବ। ଏହାକୁ ଦୃଷ୍ଟିରେ ରଖି, ସହରର ୨୭ ରାସ୍ତାର ପ୍ରାୟ ୪୦ କିଲୋମିଟର ପ୍ରଶସ୍ତ କରାଯିବାର ପ୍ରସ୍ତାବ ରହିଛି।

 ସେଥି ମଧ୍ୟରୁ ପ୍ରାୟ ୧୫ କିଲୋମିଟର ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇସାରିଛି। ଏହି ବିବାଦ କୋୟଲା ଫାଟକ-ଗୋପାଳ ମନ୍ଦିର ରାସ୍ତାର ପ୍ରସ୍ତାବିତ ପ୍ରଶସ୍ତୀକରଣ ସହିତ ଜଡିତ। ରାସ୍ତା ପ୍ରଶସ୍ତୀକରଣ ଦ୍ୱାରା ଶାହି ମସଜିଦର ଏକ ଅଂଶ ପ୍ରଭାବିତ ହେଉଛି। ମସଜିଦଠାରେ ପ୍ରସ୍ତାବିତ ପ୍ରଶସ୍ତୀକରଣ ପ୍ରାୟ ୧୧ ଫୁଟ ରହିଛି। ସ୍ଥାନୀୟ ଲୋକ ଦାବି କରୁଛନ୍ତି ଯେ, ମସଜିଦଟି ୧୦୦ ବର୍ଷରୁ ଅଧିକ ପୁରୁଣା। ତେଣୁ ସେମାନେ ସେହି ଅଂଶକୁ ପ୍ରଶସ୍ତୀକରଣକୁ ବିରୋଧ କରୁଛନ୍ତି । ଏହି ପ୍ରତିବାଦ ସମୟରେ ହଠାତ୍ ଏକ ଭିଡ଼ ଜମା ହୋଇଥିଲା। ସେମାନେ ପଥରମାଡ଼ କରିବା ଯୋଗୁଁ ବିଶୃଙ୍ଖଳା ସୃଷ୍ଟି ହୋଇଥିଲା ।
ଉଜ୍ଜୟିନୀର ପ୍ରସ୍ତାବିତ ମାଷ୍ଟର ପ୍ଲାନ୍ ୨୦୩୫ ଅନ୍ତର୍ଗତ କଣ୍ଠାଲ ଛକଠାରୁ ଗୋପାଳ ମନ୍ଦିର ପର୍ଯ୍ୟନ୍ତ ରାସ୍ତା ପ୍ରଶସ୍ତୀକରଣର ନିର୍ଦ୍ଧାରିତ ସୀମାରେ ଶାହି ମସଜିଦ୍‌ର କିଛି ଅଂଶ ବାଧା ସୃଷ୍ଟି କରୁଛି। ତେଣୁ ପ୍ରଶାସନ ପକ୍ଷରୁ ଏହାକୁ ହଟାଇବା କାର୍ଯ୍ୟ କରାଯାଉଛି ।