ଟି-ଟ୍ବେଣ୍ଟି ବିଶ୍ବକପ ଫାଇନାଲରେ ଦକ୍ଷିଣ ଆଫ୍ରିକା

ଟି୨୦ ବିଶ୍ୱକପ୍‌ ଫାଇନାଲରେ ପ୍ରବେଶ କରି ଇତିହାସ ରଚିଛି ଦକ୍ଷିଣ ଆଫ୍ରିକା। ଆଫଗାନିସ୍ତାନ ବିପକ୍ଷରେ ପ୍ରଥମ ସେମିଫାଇନାଲରେ ପ୍ରତିଦ୍ୱନ୍ଦ୍ୱିତା କରି ବିଜୟୀ ହୋଇଛି ଦଳ। ଫଳରେ ଧୂଳିସାତ ହୋଇଛି ଆଫଗାନିସ୍ତାନର ଫାଇନାଲ ଖେଳିବା ଆଶା ।ସେମିଫାଇନାଲରେ ଟସ୍‌ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଆଫଗାନିସ୍ତାନ। ହେଲେ ୨୦ ଓଭର ଖେଳିପାରି ନ ଥିଲା ଦଳ। ମାତ୍ର ୧୧.୫ ଓଭରରେ ୫୬ ରନ୍‌ କରି ହୋଇଯାଇଥିଲା ଅଲଆଉଟ୍‌। ଜବାବରେ ୮.୫ ଓଭରରେ ୧ ଉଇକେଟ ହରାଇ ୬୦ ରନ୍‌ କରିବାରେ ସଫଳ ହୋଇଥିଲା ଦକ୍ଷିଣ ଆଫ୍ରିକା। ଫଳରେ ମ୍ୟାଚ୍‌କୁ ୬୭ ବଲ୍‌ ଥାଇ ୯ ଉଇକେଟରେ ଜିତି ନେଇଛି ଦଳ। ଟି୨୦ ଅନ୍ତର୍ଜାତୀୟ ମୁକାବିଲାରେ ଏହା ଦଳର ସବୁଠାରୁ ବଡ଼ ବିଜୟ ବୋଲି କୁହାଯାଉଛି। ଏହାପୂର୍ବରୁ ୨୦୦୭ରେ ୫୧ ବଲ୍‌ ଥାଇ ପାକିସ୍ତାନକୁ ହରାଇଥିଲା ଦକ୍ଷିଣ ଆଫ୍ରିକା।