ଭାଙ୍ଗିଲା ସ୍ଲୁଇସ ଗେଟ୍: ଭୋଗରାଇରେ ପଶୁଛି ସୁବର୍ଣ୍ଣରେଖା ବନ୍ୟା ପାଣି

ଭାଙ୍ଗିଲା ସ୍ଲୁଇସ ଗେଟ୍‌। ପଶୁଛି ବନ୍ୟା ପାଣି। ସୁବର୍ଣ୍ଣରେଖା ନଦୀର ବନ୍ୟା ପାଣି ମାଡ଼ରେ ବାଲେଶ୍ବର ଜିଲ୍ଲା ଭୋଗରାଇ ବ୍ଲକ ଆଉସା ବନ୍ଧ ପୋଲରେ ଥିବା ଗେଟରେ ବିରାଟ ଫାଟ ସୃଷ୍ଟି ହୋଇଛି। ୪ ଘଣ୍ଟା ଧରି ନଦୀ ବନ୍ଧ ଭିତର ପଟକୁ ପଶୁଛି ବନ୍ୟା ପାଣି। ଫଳରେ ଆତଙ୍କିତ ହୋଇପଡ଼ିଛନ୍ତି ଗାଁ ଲୋକେ।

ସୁବର୍ଣ୍ଣରେଖା ନଦୀର ତୃତୀୟ ବନ୍ୟା ପାଣି ମାଡ଼ରେ ଗୋଟିଏ ଗେଟରେ ଫାଟ ସୃଷ୍ଟି ହୋଇ ଗାଁ ଭିତରକୁ ପାଣି ପଶିବା ଆରମ୍ଭ କରିଛି। ବିଭାଗକୁ ଅବଗତ କରିବା ପରେ ମଧ୍ୟ ଏ ପର୍ଯ୍ୟନ୍ତ ପାଣି ରୋକିବା ପାଇଁ କୌଣସି ବ୍ୟବସ୍ଥା କରାଯାଇ ନାହିଁ। ସମ୍ପୂର୍ଣ୍ଣ ଗେଟ୍‌ ଭାଙ୍ଗିଲେ ଭୋଗରାଇ ବ୍ଳକର ୬ଟି ପଞ୍ଚାୟତରେ ପାଣି ପଶିବା ନେଇ ଆଶଙ୍କା କରାଯାଉଛି।ଗୋଟେ ପଟେ ନଦୀର ପାଣି ଯଦିଓ କମୁଛି, ହେଲେ ଏବେ ବି ବିପଦ ସଂକେତ ଉପରେ ପାଣି ପ୍ରବାହିତ ହେଉଛି। ଏହାର ପ୍ରଭାବରେ ପାଣିର ଅଧିକ ଚାପ ସୃଷ୍ଟି ହୋଇ ଫଟା ଗେଟ ଦେଇ ପାଣି ପ୍ରବଳ ମାତ୍ରାରେ ନଦୀ ବନ୍ଧ ଭିତରକୁ ପ୍ରବେଶ କରୁଛି। ଯାହାକୁ ଦେଖି ଲୋକ ଆତଙ୍କିତ ହୋଇପଡ଼ିଛନ୍ତି।

ପରିସ୍ଥିତି ଦିନକୁ ଦିନ ଗମ୍ଭୀର ହେଉଥିବା ବେଳେ ଗାଁବାସୀ ଭୟ ଓ ଆତଙ୍କ ମଧ୍ୟରେ ଦିନ କାଟୁଛନ୍ତି। ଫାଟ ସୃଷ୍ଟି ହୋଇଥିବା ସ୍ଲୁଇସ ଗେଟ୍‌ରୁ ଯେଭଳି ଭାବେ ପ୍ରବଳ ବେଗରେ ପାଣି ପଶୁଛି, ତାହାକୁ ଦେଖି ସ୍ଥାନୀୟ ଲୋକେ ନିଜ ଘର ଓ ପରିବାରର ସୁରକ୍ଷାକୁ ନେଇ ଚିନ୍ତିତ ହୋଇପଡ଼ିଛନ୍ତି।ସ୍ଥାନୀୟ ଅଞ୍ଚଳବାସୀଙ୍କ ଅଭିଯୋଗ, ସମୟରେ ପ୍ରତିରୋଧକ ବ୍ୟବସ୍ଥା କରାଯାଇଥାନ୍ତା ହେଲେ ଏପରି ସଙ୍କଟଜନକ ପରିସ୍ଥିତି ସୃଷ୍ଟି ହୋଇନଥାନ୍ତା। ଏବେ ତୁରନ୍ତ ମରାମତି କାର୍ଯ୍ୟ ଆରମ୍ଭ କରାନଗଲେ ଫାଟ ଆହୁରି ବଡ଼ ହେବାର ଆଶଙ୍କା ରହିଛି।

ଏହି ସ୍ଲୁଇସ ଗେଟ୍‌ଟି ସମ୍ପୂର୍ଣ୍ଣ ଭାଙ୍ଗିପଡ଼ିଲେ ଭୋଗରାଇ ବ୍ଲକର ଅନେକ ଗାଁ ଜଳମଗ୍ନ ହୋଇପାରେ। ବିଶେଷକରି ୬ଟି ପଞ୍ଚାୟତର ହଜାର ହଜାର ଲୋକ ପ୍ରଭାବିତ ହେବା ସହ ଚାଷଜମି, ରାସ୍ତାଘାଟ ଓ ଜନଜୀବନ ଉପରେ ଗଭୀର ପ୍ରଭାବ ପଡ଼ିପାରେ ବୋଲି ଆଶଙ୍କା କରାଯାଉଛି।ନଦୀର ଜଳସ୍ତର କିଛିଟା କମିଥିଲେ ମଧ୍ୟ ବିପଦ ଏପର୍ଯ୍ୟନ୍ତ ଟଳିନାହିଁ। ବନ୍ୟା ପାଣିର ପ୍ରଚଣ୍ଡ ଚାପ ଯୋଗୁଁ ବନ୍ଧ ଓ ସ୍ଲୁଇସ ଗେଟ୍‌ର ସୁରକ୍ଷା ନେଇ ନୂଆ ଚିନ୍ତା ସୃଷ୍ଟି ହୋଇଛି। ପ୍ରଶାସନ ଓ ଜଳସମ୍ପଦ ବିଭାଗ ପକ୍ଷରୁ ତୁରନ୍ତ ପଦକ୍ଷେପ ନିଆଯିବାକୁ ଦାବି କରିଛନ୍ତି ସ୍ଥାନୀୟ ଲୋକେ।

ଏପଟେ ପରିସ୍ଥିତି ଉପରେ ନଜର ରଖି ସମ୍ଭାବ୍ୟ ବିପଦକୁ ଦୃଷ୍ଟିରେ ରଖି ତଳିଆ ଅଞ୍ଚଳର ଲୋକମାନଙ୍କୁ ସତର୍କ ରହିବାକୁ କୁହାଯାଉଛି। ଯଦି ପାଣିର ପ୍ରବାହ ଆହୁରି ବଢ଼େ, ତେବେ ଜରୁରୀ ସ୍ଥିତିରେ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବାର ବ୍ୟବସ୍ଥା ମଧ୍ୟ କରାଯାଇପାରେ।ବର୍ତ୍ତମାନ ସମସ୍ତଙ୍କ ନଜର ରହିଛି ଆଉସା ବନ୍ଧ ପୋଲର ଏହି ଫାଟିଥିବା ସ୍ଲୁଇସ ଗେଟ୍‌ ଉପରେ। ଗେଟ୍‌ଟିକୁ ସମୟରେ ସୁଦୃଢ଼ କରାଯାଇପାରିବ କି, ନା ବନ୍ୟା ପାଣି ଭୋଗରାଇର ବିସ୍ତୃତ ଅଞ୍ଚଳକୁ ପ୍ରବେଶ କରିବ—ତାହା ନେଇ ଉତ୍କଣ୍ଠାରେ ଅଛନ୍ତି ହଜାର ହଜାର ଅଞ୍ଚଳବାସୀ।