ନଦୀରେ ଓଲଟିଲା ଡ଼ଙ୍ଗା, ୨୭ ମୃତ, ୧୦୦ ନିଖୋଜ

ନାଇଜେରିଆ ନଦୀରେ ଡଙ୍ଗା ଓଲଟି ପ୍ରାୟ ୨୭ଜଣଙ୍କ ମୃତ୍ୟୁ। ସେହିପରି ନିଖୋଜ ରହିଛନ୍ତି ଶହେରୁ ଅଧିକ ଲୋକ। ସେମାନଙ୍କ ମଧ୍ୟରେ ଅଧିକ ରହିଛି ମହିଳାଙ୍କ ସଂଖ୍ୟା । ଡଙ୍ଗାଟି କୋଗି ରାଜ୍ୟରୁ ନାଇଜର ରାଜ୍ୟକୁ ଯାଉଥିବା ବେଳେ ଅଥଳ ଜଳରାଶିରେ ଭାରସାମ୍ୟ ହରାଇ ଓଲଟି ପଡ଼ିଥିବା ମିଳିଛି ସୂଚନା।ଉକ୍ତ ଡଙ୍ଗାରେ ଯାତ୍ରା କରୁଥିଲେ ୨ଶହ ଯାତ୍ରୀ। ଶୁକ୍ରବାର ନାଇଜର ନଦୀରେ ଡଙ୍ଗା ଦୁର୍ଘଟଣାଗ୍ରସ୍ତ ହେବା ପରେ ତୁରନ୍ତ ସେଠାରେ ପହଞ୍ଚିଥିଲେ ରାପିଡ୍ ରେସ୍‌ପନ୍ସ ଦଳ। ସଂଧ୍ୟା ସୁଦ୍ଧା ୨୭ ମୃତଦେହ କରିଥିଲେ ଉଦ୍ଧାର ।ଏନେଇ କୋଗି ରାଜ୍ୟର ବିପର୍ଯ୍ୟୟ ପ୍ରଶମନ ମୁଖପାତ୍ର ସ୍ୟାଣ୍ଡା ମୁସା କହିଛନ୍ତି ଯେ, ଏବେବି ଉଦ୍ଧାର କାର୍ଯ୍ୟ ଜାରି ରଖିଛନ୍ତି ସ୍ଥାନୀୟ ଉଦ୍ଧାରକାରୀ ଦଳ। ତେବେ ଡଙ୍ଗାର କ୍ଷମତା ଠାରୁ ଅଧିକ ଲୋକ ଯାତ୍ରା କରୁଥିବାରୁ ଭାରସାମ୍ୟ ହରାଇ ଡଙ୍ଗାଟି ଓଲଟି ପଡ଼ିଥିବା କହିଛନ୍ତି ସ୍ଥାନୀୟ ପ୍ରଶାସନିକ ଅଧିକାରୀ ।