ସମାନ ନାଗରିକ ସଂହିତା, ଜେଡିୟୁ କହିଲା, ବିହାରରେ ଏସବୁ ଚଳିବ ନାହିଁ !

ନୀତିଶ କୁମାରଙ୍କ ଦଳ ଜେଡିୟୁର ବରିଷ୍ଠ ନେତା ତଥା ବିଧାୟକ ଶ୍ୟାମ ରଜକ କହିଛନ୍ତି, ସଂସଦରେ ବିଲ୍ ପାସ୍ ହେଉଥିବା ସମୟରେ ମଧ୍ୟ ଆମ ଦଳ ଏହାକୁ ସମର୍ଥନ କରି ସ୍ପଷ୍ଟ କରିଥିଲା ଯେ, ଏହାକୁ ବିହାରରେ ଲାଗୁ କରାଯିବା ଉଚିତ୍ ନୁହେଁ। ଦଳ ଆଜି ମଧ୍ୟ ଏହି ମତ ବଜାୟ ରଖିଛି। 

ଆଗାମୀ ଲୋକସଭା ନିର୍ବାଚନ ପୂର୍ବରୁ ବିଜେପି-ଏନଡିଏ ଶାସିତ ୨୧ଟି ରାଜ୍ୟରେ ସମାନ ନାଗରିକ ସଂହିତା(ୟୁସିସି)ଲାଗୁ କରିବା ପାଇଁ ଗୃହମନ୍ତ୍ରୀ ଅମିତ ଶାହଙ୍କ ବିବୃତିକୁ ନେଇ ଶାସକ ମେଣ୍ଟ ଦୁଇଫାଳ ହୋଇଥିବା ପରି ମନେ ହେଉଛି। ସମାନ ନାଗରିକ ସଂହିତାକୁ ନେଇ ଏନଡିଏ ଭିତରେ ମତଭେଦ ଦେଖାଦେଇଛି। କିଛି ଏନଡିଏ ସହଯୋଗୀ ୟୁସିସିକୁ ସମର୍ଥନ କରିଛନ୍ତି, ଯେତେବେଳେ କିଛି ଏହାକୁ ବିରୋଧ କରିଛନ୍ତି। ୟୁସିସିକୁ ବିରୋଧ କରୁଥିବା ଦଳଗୁଡ଼ିକ କହିଛନ୍ତି ଯେ ଏହି ପ୍ରସଙ୍ଗରେ ଏକ ବ୍ୟାପକ ଆଲୋଚନା ହେବା ଉଚିତ୍।ତେଲୁଗୁ ଦେଶମ ପାର୍ଟି (ଟିଡିପି), ଶିବସେନା ଏବଂ ହିନ୍ଦୁସ୍ତାନୀ ଆୱାମ ମୋର୍ଚ୍ଚା(ଏଚ୍ଏଏମ୍) (ଧର୍ମନିରପେକ୍ଷ)ୟୁସିସିକୁ ସମର୍ଥନ କରିଛନ୍ତି। ଯେତେବେଳେ ଜନତା ଦଳ (ୟୁନାଇଟେଡ୍) ଏବଂ ଲୋକ ଜନଶକ୍ତି ପାର୍ଟି(ରାମ ବିଳାସ)ପରି ବିଜେପି ସହଯୋଗୀମାନେ ସତର୍କ ମନୋଭାବ ଗ୍ରହଣ କରିଛନ୍ତି।

ନୀତିଶ କୁମାରଙ୍କ ଦଳ ଜେଡିୟୁର ବରିଷ୍ଠ ନେତା ତଥା ବିଧାୟକ ଶ୍ୟାମ ରଜକ କହିଛନ୍ତି, ସଂସଦରେ ବିଲ୍ ପାସ୍ ହେଉଥିବା ସମୟରେ ମଧ୍ୟ ଆମ ଦଳ ଏହାକୁ ସମର୍ଥନ କରି ସ୍ପଷ୍ଟ କରିଥିଲା ଯେ, ଏହାକୁ ବିହାରରେ ଲାଗୁ କରାଯିବା ଉଚିତ୍ ନୁହେଁ। ଦଳ ଆଜି ମଧ୍ୟ ଏହି ମତ ବଜାୟ ରଖିଛି।

ଶ୍ୟାମ ରଜକ କହିଛନ୍ତି, କୌଣସି ପରିସ୍ଥିତିରେ ବିହାରରେ ୟୁସିସି କାର୍ୟ୍ୟକାରୀ କରିବା ନେଇ ପ୍ରଶ୍ନ ଉଠୁନି। ବିହାରରେ ବର୍ତ୍ତମାନର ଏନଡିଏ ସରକାର ବିଷୟରେ ଉଲ୍ଲେଖ କରି ସେ କହିଛନ୍ତି ଯେ, ଏହା କେବଳ ବିଜେପି ସରକାର ନୁହେଁ, ବରଂ ଅନେକ ସହଯୋଗୀଙ୍କ ମେଣ୍ଟ। ମୁଖ୍ୟମନ୍ତ୍ରୀ ବିଜେପିର, କିନ୍ତୁ ସରକାର ଏକ ଏନଡିଏ ସରକାର। ଯେଉଁଥିରେ ଜେଡିୟୁ, ହିନ୍ଦୁସ୍ତାନୀ ଆୱାମ ମୋର୍ଚ୍ଚା ଏବଂ ଏଲଜେପି ସମେତ ଅନ୍ୟାନ୍ୟ ସହଯୋଗୀ ଦଳ ସାମିଲ ଅଛନ୍ତି। ବିଜେପି ନେତୃତ୍ୱ ସହିତ ଏହି ପ୍ରସଙ୍ଗରେ ଆଲୋଚନା କରିବ ବୋଲି ଜେଡିୟୁ ମଧ୍ୟ ସୂଚାଇ ଦେଇଛି। ଜେଡିୟୁର ରାଷ୍ଟ୍ରୀୟ ମୁଖପାତ୍ର ରାଜୀବ ରଞ୍ଜନ କହିଛନ୍ତି ଯେ କାର୍ୟ୍ୟକାରୀ ସଭାପତି ସଞ୍ଜୟ କୁମାର ଝା ଖୁବ୍ ଶୀଘ୍ର ଶାହଙ୍କ ସହ ଏହି ବିଷୟରେ ଆଲୋଚନା କରିବେ।

ଏଲଜେପି(ରାମ ବିଳାସ)ମୁଖ୍ୟ ତଥା କେନ୍ଦ୍ର ମନ୍ତ୍ରୀ ଚିରାଗ ପାସୱାନ କହିଛନ୍ତି, ଭାରତର ସାମାଜିକ ଗଠନ ବିବିଧ, ଏବଂ ବିଭିନ୍ନ ସମ୍ପ୍ରଦାୟର ନିଜସ୍ୱ ନାଗରିକ ପରମ୍ପରା ଏବଂ ରୀତିନୀତି ଅଛି। ସମ୍ବିଧାନରେ ଅନୁସୂଚିତ ଜନଜାତିଙ୍କୁ ଦିଆଯାଇଥିବା ବିଭିନ୍ନ ଛାଡ଼କୁ ଉଲ୍ଲେଖ କରି ସେ କହିଛନ୍ତି ଯେ ତାଙ୍କ ଦଳ ସମାନତା ଏବଂ ବିବିଧତା ଉଭୟ ପାଇଁ ପ୍ରତିଶ୍ରୁତିବଦ୍ଧ। ୟୁସିସି ଡ୍ରାଫ୍ଟ ସାର୍ବଜନୀନ ହେବା ପରେ, ସମସ୍ତ ଅଂଶୀଦାରଙ୍କ ସ୍ୱାର୍ଥ ବିଚାର କରାଯିବା ପରେ ଏବଂ ବ୍ୟାପକ ପରାମର୍ଶ କରାଯିବା ପରେ ଦଳ ନିଜର ମତାମତ ପ୍ରକାଶ କରିବ।

ଟିଡିପି ୟୁସିସିକୁ ସମର୍ଥନ କରେ, କିନ୍ତୁ ଏଥିରେ ସମସ୍ତ ଅଂଶୀଦାରଙ୍କୁ ସାମିଲ କରିବାକୁ ଚାହୁଁଛି। ଟିଡିପି ସଂସଦୀୟ ଦଳ ନେତା ଲାଭୁ ଶ୍ରୀକୃଷ୍ଣ ଦେବରାୟାଲୁ କହିଛନ୍ତି, ଆମେ ଏହାକୁ ସମର୍ଥନ କରିବୁ। ଏହା ଉପରେ ବର୍ତ୍ତମାନ କୌଣସି ଆଲୋଚନା ହେଉନାହିଁ। କିନ୍ତୁ ଯେତେବେଳେ ଆମେ ଆବଶ୍ୟକତା ଅନୁଭବ କରିବୁ, ଆମେ ଏହା ଉପରେ ବିଚାର କରିବୁ। ଏହାକୁ ଗ୍ରହଣ କରିବା ପୂର୍ବରୁ ଆମେ ନିଶ୍ଚିତ ଭାବରେ ବିଭିନ୍ନ ଅଂଶୀଦାରଙ୍କ ମତାମତକୁ ଏଥିରେ ସାମିଲ କରିବୁ। ତେବେ ଟିଡିପିର ବର୍ତ୍ତମାନର ମତ ପୂର୍ବ ମତଠାରୁ ଭିନ୍ନ ରହିଛି। ୨୦୨୪ ଲୋକସଭା ନିର୍ବାଚନ ପରେ ଏନଡିଏରେ ଯୋଗଦେବା ପୂର୍ବରୁ, ଟିଡିପି ମୁଖ୍ୟ ଏବଂ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଏନ. ଚନ୍ଦ୍ରବାବୁ ନାଇଡୁ କହିଥିଲେ, ୟୁସିସିର ପ୍ରସଙ୍ଗ ଆସିଲେ ଟିଡିପି ମୁସଲିମ ସମ୍ପ୍ରଦାୟ ସହିତ ଠିଆ ହେବ।

ଶିବସେନା ୟୁସିସି ଲାଗୁ କରିବା ନେଇ ଶାହଙ୍କ ପ୍ରୟାସକୁ ଦୃଢ଼ ସମର୍ଥନ କରିଛି। ଦଳର ନେତା ଶ୍ରୀକାନ୍ତ ସିନ୍ଦେ କହିଛନ୍ତି, ୟୁସିସି ସମାନତା, ନ୍ୟାୟ ଏବଂ ଜାତୀୟ ଏକତାର ନୀତି ଉପରେ ଆଧାରିତ। ଏହା ଆମର ପ୍ରତିଷ୍ଠାତା ବାଲାସାହେବ ଠାକରେଙ୍କ ଦୀର୍ଘକାଳୀନ ଆଦର୍ଶଗତ ଦୃଷ୍ଟିକୋଣ ମଧ୍ୟ ରହିଛି। ଏକ ଆଦର୍ଶଗତ ସହଯୋଗୀ ଭାବରେ, ଭାରତର ଜନସାଧାରଣଙ୍କୁ ଦିଆଯାଇଥିବା ପ୍ରତିଶ୍ରୁତି ପୂରଣ କରିବାରେ ସରକାରଙ୍କ ସହିତ ଦୃଢ଼ ଭାବରେ ଠିଆ ହେବା ଆମର କର୍ତ୍ତବ୍ୟ। ଆମର ନେତା ଏକନାଥ ସିନ୍ଦେ ୟୁସିସିକୁ କାର୍ୟ୍ୟକାରୀ କରିବା ଏବଂ ଏକ ଶକ୍ତିଶାଳୀ, ଏକତା ଏବଂ ପ୍ରଗତିଶୀଳ ଭାରତର ଦୃଷ୍ଟିକୋଣକୁ ଆଗକୁ ବଢ଼ାଇବା ପାଇଁ ସମ୍ପୂର୍ଣ୍ଣ ପ୍ରତିଶ୍ରୁତିବଦ୍ଧ। ସେହିପରି ହିନ୍ଦୁସ୍ତାନୀ ଆୱାମ ମୋର୍ଚ୍ଚା ରାଷ୍ଟ୍ରୀୟ ଅଧ୍ୟକ୍ଷ ସନ୍ତୋଷ କୁମାର ସୁମନ ମଧ୍ୟ ଶାହଙ୍କ ବକ୍ତବ୍ୟକୁ ସମର୍ଥନ କରିଛନ୍ତି।