ଆମେରିକୀୟ କର୍ମଚାରୀଙ୍କୁ ବହିଷ୍କାର କଲେ ଭୋଗିବ ପରିଣାମ : ଭାରତୀୟଙ୍କ ପାଇଁ ବଡ଼ ଝଟକା

ଆମେରିକାର ଉପରାଷ୍ଟ୍ରପତି ଜେ.ଡି. ଭାନ୍ସ ଆମେରିକୀୟ କର୍ମଚାରୀମାନଙ୍କୁ ବହିଷ୍କାର କରିବା ସହିତ ଏଚ୍-୧ବି କାର୍ଯ୍ୟକ୍ରମ ଅଧୀନରେ ଆମେରିକୀୟ କର୍ମଚାରୀଙ୍କୁ ବଦଳାଇବାକୁ ଚାହୁଁଥିବା 

 ଆମେରିକାର ଉପରାଷ୍ଟ୍ରପତି ଜେ.ଡି. ଭାନ୍ସ ଆମେରିକୀୟ କର୍ମଚାରୀମାନଙ୍କୁ ବହିଷ୍କାର କରିବା ସହିତ ଏଚ୍-୧ବି କାର୍ଯ୍ୟକ୍ରମ ଅଧୀନରେ ଆମେରିକୀୟ କର୍ମଚାରୀଙ୍କୁ ବଦଳାଇବାକୁ ଚାହୁଁଥିବା କମ୍ପାନିଗୁଡ଼ିକ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆହ୍ୱାନ ଦେଇଛନ୍ତି। ଏହି ପଦକ୍ଷେପ ଏପରି ସମୟରେ ଆସିଛି ଯେତେବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଭିସାଧାରୀଙ୍କ ଉପରେ କଠୋର ଆଭିମୁଖ୍ୟ ଗ୍ରହଣ କରୁଛନ୍ତି। ଯାହା ଫଳରେ ସେମାନଙ୍କ ପାଇଁ ଆମେରିକାରେ କାମ କରିବା କଷ୍ଟକର ହେଉଛି।

ଏହା ବିଶେଷ କରି ଭାରତୀୟ ବୃତ୍ତିଗତମାନଙ୍କ ମଧ୍ୟରେ ଚିନ୍ତା ବଢ଼ାଇଛି, କାରଣ ଭାରତୀୟମାନେ ଆମେରିକାର ଏଚ୍-୧ବି ଭିସାର ସର୍ବାଧିକ ଲାଭାର୍ଥୀ ହୋଇଛନ୍ତି।ସୋସିଆଲ ମିଡିଆ ଏକ୍ସରେ ପୋଷ୍ଟ କରି,ଆମେରିକୀୟ ଉପରାଷ୍ଟ୍ରପତି ଲେଖିଛନ୍ତି ଯେ ତାଙ୍କ ସରକାର କମ୍ପାନିଗୁଡ଼ିକୁ ଆମେରିକୀୟ କର୍ମଚାରୀଙ୍କୁ ହ୍ରାସ କରି ସେମାନଙ୍କର କର୍ମଚାରୀ ଅଭାବ ଦାବି ରୋକିବା ପାଇଁ ଉପାୟ ବିଚାର କରୁଛି। ସେ କହିଛନ୍ତି ଯେ ଅନେକ କମ୍ପାନି ଏଚ୍-୧ବି ପାଇଁ ଆବେଦନ କରନ୍ତି ଏବଂ କୁହନ୍ତି ଯେ ସେମାନେ କର୍ମଚାରୀ ପାଉନାହାନ୍ତି।

 ମାତ୍ର ଅପରପକ୍ଷରେ ସେମାନେ ୫ ହଜାର ଲୋକଙ୍କୁ ବହିଷ୍କାର କରିଥିବା ସେମାନଙ୍କର ରେକର୍ଡରୁ ଜଣାପଡ଼ିଥାଏ।
ଭାନ୍ସ ତାଗିଦ୍ କରି କହିଛନ୍ତି, ଯଦି କୌଣସି କମ୍ପାନି ଆମେରିକୀୟ କର୍ମଚାରୀଙ୍କୁ ଛଟେଇ କରୁଛି, ତେବେ ସେମାନଙ୍କୁ ବିଦେଶୀ କର୍ମଚାରୀଙ୍କ ସହିତ ବଦଳାଯିବା ଉଚିତ୍ ନୁହେଁ। ଏଚ୍-୧ବି ଭିସା କାର୍ଯ୍ୟକ୍ରମ ଆମେରିକୀୟ କର୍ମଚାରୀଙ୍କୁ ବଦଳାଇବା ପାଇଁ ଉଦ୍ଦିଷ୍ଟ ନୁହେଁ। ଏଚ୍-୧ବିର ଉଦ୍ଦେଶ୍ୟ ଆମେରିକୀୟ କର୍ମଚାରୀଙ୍କ ତୁଳନାରେ କମ୍ ଦରମା ପାଉଥିବା ବିଦେଶୀ କର୍ମଚାରୀଙ୍କ ସହିତ ବଦଳାଇବା ଉଚିତ୍ ନୁହେଁ। ଏହାର ଉଦ୍ଦେଶ୍ୟ ଆମେରିକୀୟ ଅର୍ଥନୀତିକୁ ସୁଦୃଢ଼ କରିବା ଉଚିତ୍।

ସେପ୍ଟେମ୍ବର ୧୮ ତାରିଖରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ସ୍ୱାକ୍ଷର କରିଥିଲେ ଯେଉଁଥିରେ ସଂଘୀୟ ଏଜେନ୍ସିଗୁଡ଼ିକୁ ଏଚ୍-୧ବି ଆବେଦନଗୁଡ଼ିକର ସମୀକ୍ଷା କରିବା ସମୟରେ ନିଯୁକ୍ତିଦାତାଙ୍କ ଦ୍ୱାରା ଆରମ୍ଭ ହୋଇଥିବା ଛଟେଇ ବିଷୟରେ ବିଚାର କରିବାକୁ ନିର୍ଦ୍ଦେଶ ଦିଆଯାଇଥିଲା। ଏହା ମଧ୍ୟ ଗୁରୁତ୍ୱାରୋପ କରାଯାଇଥିଲା ଯେ, ନିଯୁକ୍ତିଦାତା ଏଚ୍-୧ବି କାର୍ଯ୍ୟକ୍ରମ କାର୍ଯ୍ୟକାରୀ କରିବା ସମୟରେ ଆମେରିକୀୟ କର୍ମଚାରୀମାନଙ୍କୁ ଯେପରି ଛଟେଇ ନକରିଥିବେ ତାହା ନିଶ୍ଚିତ କରିବେ।
ଆମେ ଏଚ୍-୧ବି ଭିସା ବ୍ୟବସ୍ଥାରେ ହେଉଥିବା ଜାଲିଆତି ଦେଖିଲୁ ଏବଂ କଂଗ୍ରେସ ଆଇନ ପରିବର୍ତ୍ତନ ପାଇଁ ଅପେକ୍ଷା କରିବା ପରିବର୍ତ୍ତେ ପ୍ରଶାସନିକ ପରିବର୍ତ୍ତନ କରିବାକୁ ନିଷ୍ପତ୍ତି ନେଲୁ ବୋଲି ଭାନ୍ସ ‌ଚେତାବନୀ ଦେଇଛନ୍ତି।

ଆମେରିକାର ଏଚ୍-୧ବି ଭିସା କାର୍ଯ୍ୟକ୍ରମ ଅଧୀନରେ କମ୍ପାନିଗୁଡ଼ିକ ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ, ଶିକ୍ଷା ଏବଂ ଗବେଷଣା ଭଳି ବିଶେଷ କ୍ଷେତ୍ରରେ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେଇପାରିବେ। ଆମେରିକା ପ୍ରତିବର୍ଷ ୬୫ ହଜାର ନିୟମିତ ଏଚ୍-୧ବି ଭିସା ଏବଂ ଆଡଭାନ୍ସ ଡିଗ୍ରୀ ଥିବା କର୍ମଚାରୀଙ୍କ ପାଇଁ ୨୦ ହଜାର ଭିସା ପ୍ରଦାନ କରିଥାଏ। ୨୦୨୫ ଆର୍ଥିକ ବର୍ଷରେ ଆମେରିକାର ଏଚ୍-୧ବି ଭିସାଧାରୀଙ୍କ ମଧ୍ୟରୁ ୭୦ ପ୍ରତିଶତରୁ ଅଧିକ ଭାରତୀୟ ଥିଲେ।
ଟ୍ରମ୍ପ ପ୍ରଶାସନ ଏହି ଭିସା ପାଇବାକୁ ଅଧିକ ମହଙ୍ଗା ଏବଂ କଷ୍ଟକର କରିଛି, ଏବଂ କମ୍ପାନିଗୁଡ଼ିକ ଉପରେ ଯାଞ୍ଚ ମଧ୍ୟ ବୃଦ୍ଧି କରିଛି। ବର୍ଦ୍ଧିତ ଫି ଏବଂ କମ୍ପାନିଗୁଡ଼ିକ ଉପରେ ଯାଞ୍ଚର ବୃଦ୍ଧି ସ୍ପଷ୍ଟ ଭାବରେ ଭାରତୀୟମାନଙ୍କୁ ସବୁଠାରୁ ଅଧିକ ପ୍ରଭାବିତ କରିବ। ଯେହେତୁ ଭାରତୀୟମାନେ ଏହି ଭିସାର ସର୍ବାଧିକ ପ୍ରାପ୍ତକର୍ତ୍ତା, ସେମାନେ ବିଶେଷ ଭାବରେ ପ୍ରଭାବିତ ହେବେ। କଠୋର ନିୟମାବଳୀ ଆମେରିକୀୟ କମ୍ପାନିଗୁଡ଼ିକ ପାଇଁ ବିଦେଶୀ କର୍ମଚାରୀଙ୍କୁ ନିଯୁକ୍ତି ଦେବା କଷ୍ଟକର କରିବ।