ଲଗାଣ ବର୍ଷାରେ ବେହାଲ ରାଜଧାନୀ ଦିଲ୍ଲୀ

ଲଗାଣ ବର୍ଷାରେ ବେହାଲ ରାଜଧାନୀ ଦିଲ୍ଲୀ। ବିଭିନ୍ନ ସ୍ଥାନରେ ଜଳମଗ୍ନ ହୋଇ ସୃଷ୍ଟି ହୋଇଛି ବନ୍ୟା ପରିସ୍ଥିତି। ବର୍ଷା ପାଣିରେ ଭାସିଯାଇ ଅଲଗା ଅଲଗା ସ୍ଥାନରେ ୪ ଛୋଟ ପିଲାଙ୍କ ସମେତ ୬ ଜଣଙ୍କ ହୋଇଛି ମୃତ୍ୟୁ।ଦିଲ୍ଲୀର ଓଖଲା ଅଣ୍ଡରପାସ୍‌ରେ ପାର୍ଣି ଭର୍ତ୍ତି ହୋଇଯିବାରୁ ଏଥିରେ ବୁଡ଼ିଯାଇ ଜଣେ ୬୦ ବର୍ଷୀୟ ବ୍ୟକ୍ତିଙ୍କ ହୋଇଛି ମୃତ୍ୟୁ। ସେହିପରି ଶନିବାର ଅପରାହ୍ନ ଉତ୍ତର ଦିଲ୍ଲୀର ସମୟପୁର ବଦଳି ଅଞ୍ଚଳରେ ଦୁଇ ଜଣ ଛୋଟ ପିଲା ବର୍ଷା ପାଣିରେ ଭାସି ଯାଇ ମୃତ୍ୟୁ ବରଣ କରିଛନ୍ତି। ଏଠାରେ ଦୁଇରୁ ୩ ଫୁଟ୍‌ ଉଚ୍ଚର ପାଣି ଜମି ରହିଥିଲା।ଶୁକ୍ରବାର ମଧ୍ୟ ଦୁଇ ଜଣ ପିଲାଙ୍କ ମୃତ୍ୟୁ ହୋଇଛି। ଖେଳୁଥିବା ବେଳେ ଏମାନେ ପାଣିରେ ବୁଡ଼ି ଯାଇଥିଲେ। ପରେ ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା। ସେହିପରି ଉତ୍ତର ପୂର୍ବ ଦିଲ୍ଲୀର ସାଲିମାର ବାଗ୍‌ ଅଞ୍ଚଳରେ ଜଣେ ୨୦ ବର୍ଷୀୟ ଯୁବକଙ୍କ ପାଣିରେ ବୁଡ଼ି ମୃତ୍ୟୁ ହୋଇଛି। ଉକ୍ତ ୨୦ ବର୍ଷୀୟ ଯୁବକ ଜଣକ ଆଜାଦପୁର ଗୋଦାମରେ କାମ କରୁଥିଲେ।ଗତ କିଛି ଦିନ ହେବ ଗରମ ଓ ଗୁଳୁଗୁଳି ଓ ପାଣି ପାଇଁ ଛଟପଟ ହେଉଥିବା ଦିଲ୍ଲୀବାସୀଙ୍କୁ ଏଥିରୁ ଆଶ୍ୱସ୍ତି ମିଳିଛି ସତ ହେଲେ ମୌସୁମୀ ବର୍ଷା ଏଠାରେ ତାଣ୍ଡବ ରଚିଛି। ଦୀର୍ଘ ୮୮ ବର୍ଷର ରେକର୍ଡ ଭାଙ୍ଗିଛି ଜୁନ୍‌ ମାସର ବର୍ଷା। ବିଭିନ୍ନ ସ୍ଥାନରେ ପାଣି ଜମି ଯିବା ଯୋଗୁ ସାଧାରଣ ଲୋକଙ୍କ ଠାରୁ ଆରମ୍ଭ କରି ମନ୍ତ୍ରୀ ଓ ସାଂସଦମାନେ ମଧ୍ୟ ନାହିଁ ନଥିବା ଅସୁବୁଧାର ସମ୍ମୁଖୀନ ହୋଇଛନ୍ତି।