ହାଇକୋର୍ଟ କାହିଁକି ଦେଲେ ଏଭଳି ନିର୍ଦ୍ଦେଶ, ଅଧିକାରୀଙ୍କ ଦରମାରୁ କଟିବ ଜରିମାନା ଟଙ୍କା, ଜାଣନ୍ତୁ ନିୟମ

ହାଇକୋର୍ଟଙ୍କ ଦୁଇଜଣିଆ ଖଣ୍ଡପୀଠ ଜଷ୍ଟିସ୍ ଅତୁଲ ଶ୍ରୀଧରନ୍ ଓ ଜଷ୍ଟିସ୍ ଅଚଳ ସଚଦେବ ଏହି ମାମଲାରେ ପ୍ରଶାସନର ଭୂମିକାକୁ କଡ଼ା ଭାବେ ସମାଲୋଚନା କରିଛନ୍ତି ।

କୋର୍ଟ କହିଛନ୍ତି, ଆକୃତିଙ୍କୁ ଉଦାହରଣ ଭାବେ ଦେଖାଇ ଅନ୍ୟମାନଙ୍କୁ ଆନ୍ଦୋଳନରୁ ଦୂରେଇ ରଖିବାର ଉଦ୍ଦେଶ୍ୟ ଥିବା ଭଳି ମନେହେଉଛି । ଏଭଳି ଭାବରେ ଏନଏସଏ ଭଳି କଠୋର ଆଇନର ବ୍ୟବହାରକୁ କୋର୍ଟ ନାପସନ୍ଦ କରିଛନ୍ତି ।  

ଜଣେ ୨୫ ବର୍ଷୀୟା ମହିଳା ଏକ ବିକ୍ଷୋଭ ପ୍ରଦର୍ଶନରେ ସାମିଲ ହୋଇ ହଠାତ୍ ଜେଲ୍‌ରେ ପହଞ୍ଚିଯାଇଥିଲେ । ମାମଲା ଏପରି ସ୍ତରକୁ ଗଲା ଯେ ତାଙ୍କୁ ପ୍ରାୟ ପାଞ୍ଚ ମାସ ଧରି ବିଚାରାଧୀନ ବନ୍ଦୀ ଭାବେ ଜେଲ୍‌ରେ ରହିବାକୁ ପଡ଼ିଥିଲା । ପରବର୍ତ୍ତୀ ସମୟରେ କୋର୍ଟ ଏଥିରେ ହସ୍ତକ୍ଷେପ କରି କହିଲେ ଯେ, ଯେଉଁ ଆଧାରରେ ତାଙ୍କୁ ଅଟକ ରଖାଯାଇଥିଲା, ସେଥିରେ ଗୁରୁତର ତ୍ରୁଟି ରହିଥିଲା । ଏହା ହେଉଛି ଦିଲ୍ଲୀ ବିଶ୍ୱବିଦ୍ୟାଳୟରୁ ସ୍ନାତକ ହାସଲ କରିଥିବା ଆକୃତି ଚୌଧୁରୀଙ୍କ ଘଟଣା; ଏପ୍ରିଲ୍ ୨୦୨୬ରେ ନୋଏଡ଼ାଠାରେ ଶ୍ରମିକମାନଙ୍କର ଏକ ବିକ୍ଷୋଭ ସମୟରେ ତାଙ୍କୁ ଗିରଫ କରାଯାଇଥିଲା । ପରବର୍ତ୍ତୀ ସମୟରେ, ତାଙ୍କ ବିରୁଦ୍ଧରେ ଜାତୀୟ ସୁରକ୍ଷା ଆଇନ ଲାଗୁ କରାଯାଇଥିଲା । ବର୍ତ୍ତମାନ, ଆହ୍ଲାବାଦ ହାଇକୋର୍ଟ କେବଳ ଏନଏସଏ ଅଧୀନରେ ତାଙ୍କର ଅଟକ ଆଦେଶକୁ ରଦ୍ଦ କରିନାହାନ୍ତି, ବରଂ ୫ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି । ଉଲ୍ଲେଖନୀୟ ବିଷୟ ହେଉଛି, କୋର୍ଟ ନିର୍ଦ୍ଦେଶ ଦେଇଛନ୍ତି ଯେ ଏହି ଅର୍ଥ ରାଜ୍ୟ ରାଜକୋଷରୁ ନୁହେଁ, ବରଂ ଗୌତମ ବୁଦ୍ଧ ନଗରର ଜିଲ୍ଲା ମାଜିଷ୍ଟ୍ରେଟ୍  ମେଧା ରୂପମ୍‌ଙ୍କ ଦରମାରୁ ଆଦାୟ କରାଯିବ ।

ଏପ୍ରିଲ ୨୦୨୬ରେ ନୋଏଡାରେ ଶ୍ରମିକଙ୍କ ଆନ୍ଦୋଳନ ସମୟରେ ହିଂସା ଓ ପଥରମାଡ଼ ଘଟଣାକୁ ନେଇ ଆକୃତିଙ୍କୁ ଗିରଫ କରାଯାଇଥିଲା । ପ୍ରାୟ ୫ ମାସ ଧରି ସେ ଜେଲରେ ଅଛନ୍ତି ।  ତାଙ୍କ ଉପରେ ଆନ୍ଦୋଳନକାରୀଙ୍କୁ ହିଂସା ଓ ଅଗ୍ନିକାଣ୍ଡ ପାଇଁ ଉସକାଇବା ଭଳି ଅଭିଯୋଗ ଲଗାଯାଇଥିଲା । ପରେ ଗୌତମ ବୁଦ୍ଧ ନଗରର ଜିଲ୍ଲାପାଳ ମେଧା ରୂପମଙ୍କ ଆଦେଶରେ ଏନଏସଏ ଲାଗୁ କରାଯାଇଥିଲା ।  

ତେବେ ମାମଲାର ଶୁଣାଣି ସମୟରେ ହାଇକୋର୍ଟ ଆକୃତିଙ୍କ ବିରୋଧରେ ଥିବା ପ୍ରମାଣକୁ ନେଇ ଗଭୀର ପ୍ରଶ୍ନ ଉଠାଇଥିଲେ । ହିଂସାତ୍ମକ ଘଟଣାରେ ଆକୃତିଙ୍କ ବ୍ୟକ୍ତିଗତ ଭୂମିକା ପ୍ରମାଣ କରିବା ପାଇଁ ପର୍ୟ୍ୟାପ୍ତ ଓ ଭରସାଯୋଗ୍ୟ ସାମଗ୍ରୀ ନଥିବା କୋର୍ଟ କହିଛନ୍ତି । ଏପରିକି ତାଙ୍କ ଗିରଫକୁ ନେଇ ମଧ୍ୟ ପ୍ରଶାସନର ବୟାନରେ ଅସଙ୍ଗତି ଥିବା ଜଣାପଡ଼ିଥିଲା । 

ହାଇକୋର୍ଟଙ୍କ ଦୁଇଜଣିଆ ଖଣ୍ଡପୀଠ ଜଷ୍ଟିସ୍ ଅତୁଲ ଶ୍ରୀଧରନ୍ ଓ ଜଷ୍ଟିସ୍ ଅଚଳ ସଚଦେବ ଏହି ମାମଲାରେ ପ୍ରଶାସନର ଭୂମିକାକୁ କଡ଼ା ଭାବେ ସମାଲୋଚନା କରିଛନ୍ତି । କୋର୍ଟ କହିଛନ୍ତି, ଆକୃତିଙ୍କୁ ଉଦାହରଣ ଭାବେ ଦେଖାଇ ଅନ୍ୟମାନଙ୍କୁ ଆନ୍ଦୋଳନରୁ ଦୂରେଇ ରଖିବାର ଉଦ୍ଦେଶ୍ୟ ଥିବା ଭଳି ମନେହେଉଛି । ଏଭଳି ଭାବରେ ଏନଏସଏ ଭଳି କଠୋର ଆଇନର ବ୍ୟବହାରକୁ କୋର୍ଟ ନାପସନ୍ଦ କରିଛନ୍ତି । 
ଏହାସହ କୋର୍ଟ ଚେତାବନୀ ଦେଇଛନ୍ତି ଯେ ପ୍ରଶାସନିକ ଅଧିକାରୀମାନେ ଯଦି ଏଭଳି ମନମୁଖୀ ଭାବରେ କ୍ଷମତାର ବ୍ୟବହାର କରନ୍ତି, ତେବେ ଉତ୍ତରପ୍ରଦେଶକୁ ଏକ ‘ଅରୱେଲିଆନ୍ ଡିଷ୍ଟୋପିଆ’ ଆଡ଼କୁ ନେଇଯାଇପାରନ୍ତି  । କୋର୍ଟ ଡିଏମ୍ ଓ ସମ୍ପୃକ୍ତ ପୁଲିସ ଅଧିକାରୀଙ୍କ ପ୍ରତି ନିଜର ଅସନ୍ତୋଷକୁ ସେମାନଙ୍କ ସର୍ଭିସ୍ ରେକର୍ଡରେ ଲିପିବଦ୍ଧ କରିବାକୁ ମଧ୍ୟ କହିଛନ୍ତି ।
ତେଣୁ ୫ ଲକ୍ଷ ଟଙ୍କାର ଏହି ମୁଆବଜା କେବଳ ଆକୃତିଙ୍କୁ କ୍ଷତିପୂରଣ ନୁହେଁ; ଏହା ପ୍ରଶାସନିକ କ୍ଷମତାର ଦାୟିତ୍ୱବୋଧ ଏବଂ ନାଗରିକଙ୍କ ମୌଳିକ ଅଧିକାରର ସୁରକ୍ଷା ନେଇ ହାଇକୋର୍ଟଙ୍କ ଏକ କଡ଼ା ବାର୍ତ୍ତା ଭାବେ ଦେଖାଯାଉଛି।v