ଏଆଇ ତ୍ରୁଟି ଯୋଗୁଁ ଆମେରିକା ଏବଂ ଚୀନ୍ ମଧ୍ୟରେ ସମୁଦ୍ରରେ ସୃଷ୍ଟି ହୋଇଥାନ୍ତା ସଂଘର୍ଷ

ଚଳିତ ବର୍ଷ ଆରମ୍ଭରେ ଆମେରିକା ଏବଂ ଚୀନ୍ ମଧ୍ୟରେ ଏକ ବଡ଼ ସାମରିକ ସଂଘର୍ଷ ଅଳ୍ପକେ ଏଡାଇ ଦିଆଯାଇଥିଲା। ସିଏନଏନ ରିପୋର୍ଟ ଅନୁଯାୟୀ, ଏଆଇ ବ୍ୟବହାର କରି ପ୍ରସ୍ତୁତ ହୋଇଥିବା ଏକ ଗୁପ୍ତଚର 

ଚଳିତ ବର୍ଷ ଆରମ୍ଭରେ ଆମେରିକା ଏବଂ ଚୀନ୍ ମଧ୍ୟରେ ଏକ ବଡ଼ ସାମରିକ ସଂଘର୍ଷ ଅଳ୍ପକେ ଏଡାଇ ଦିଆଯାଇଥିଲା। ସିଏନଏନ ରିପୋର୍ଟ ଅନୁଯାୟୀ, ଏଆଇ ବ୍ୟବହାର କରି ପ୍ରସ୍ତୁତ ହୋଇଥିବା ଏକ ଗୁପ୍ତଚର ରିପୋର୍ଟ ଆଧାରରେ ଆମେରିକା ସେନା ମଧ୍ୟପ୍ରାଚ୍ୟରେ ଚୀନ୍ ଜାହାଜକୁ ଅଟକାଇବା ଏବଂ ସେଥିରେ ଚଢ଼ିବା ପାଇଁ ପ୍ରସ୍ତୁତ ହେଉଥିଲା। ଆମେରିକାର ଗୁପ୍ତଚର ସଂସ୍ଥା ସୂଚିତ କରିଥିଲା ଯେ, ଚୀନ୍ ଜାହାଜଟି ପରମାଣୁ ଅସ୍ତ୍ର-ସମ୍ବନ୍ଧୀୟ ସାମଗ୍ରୀ ବହନ କରୁଛି। ଏହି ସୂଚନା ପରେ, ଆମେରିକୀୟ ସେନା ଜାହାଜକୁ ଅଟକାଇବା ପାଇଁ ପ୍ରସ୍ତୁତି ଆରମ୍ଭ କରିଦେଇଥିଲା।

 ତେବେ କାର୍ଯ୍ୟାନୁଷ୍ଠାନ ପୂର୍ବରୁ, ଅଧିକାରୀମାନେ ରିପୋର୍ଟକୁ ପୁନଃପରୀକ୍ଷଣ କରିଥିଲେ। ଶେଷ ମୁହୂର୍ତ୍ତରେ ଜଣାପଡ଼ିଥିଲା ରିପୋର୍ଟ ପ୍ରସ୍ତୁତ କରିଥିବା ବିଶ୍ଳେଷକ ଏକ ଏଆଇ ଚାଟବଟ୍ ବ୍ୟବହାର କରିଥିଲେ। ଏଆଇ ଚାଟବଟ୍ ଜାହାଜରେ ଥିବା ମାଲବାହୀ ଜିନିଷକୁ ଭୁଲ୍ ଭାବେ ଚିହ୍ନଟ କରିଥିଲା। ପରମାଣୁ ଅସ୍ତ୍ର ବୋଲି ଅନୁମାନ କରାଯାଉଥିବା ଜିନିଷ ପ୍ରକୃତରେ ଅନ୍ୟ କିଛି ଥିଲା।

ଫଳସ୍ୱରୂପ, ଆମେରିକୀୟ ଅଧିକାରୀମାନେ କାର୍ଯ୍ୟାନୁଷ୍ଠାନକୁ ବନ୍ଦ କରିଦେଇଥିଲେ।ଏହି ଘଟଣା ସହିତ ଜଡ଼ିତ ଚାରୋଟି ଅଜ୍ଞାତ ସୂତ୍ର ଆଧାରରେ ସିଏନଏନ ଏହି ସୂଚନା ପ୍ରଦାନ କରିଛି। ଗୋଟିଏ ସୂତ୍ର କହିଛି ଯେ, ଗୁଇନ୍ଦା ରିପୋର୍ଟ ସମ୍ପୂର୍ଣ୍ଣ ଭୁଲ୍ ଥିଲା ଏବଂ ଏହା ଯୋଗୁଁ ଏକ ଯୁଦ୍ଧ ଆରମ୍ଭ ହୋଇଥାନ୍ତା। ତେବେ ଜାହାଜଟି ପ୍ରକୃତରେ କେଉଁ ମାଲ୍ ବୋହି ନେଉଥିଲା କିମ୍ବା ଏହା କେଉଁଠାକୁ ଯାଉଥିଲା ତାହା ଗଣମାଧ୍ୟମ ସଂସ୍ଥା ପ୍ରକାଶ କରିନାହିଁ। ମଧ୍ୟପ୍ରାଚ୍ୟରେ ଆମେରିକୀୟ ସେନାର ତଦାରଖ କରୁଥିବା ୟୁଏସ କେନ୍ଦ୍ରୀୟ କମାଣ୍ଡ, ଏହି ବିଷୟରେ ଗଣମାଧ୍ୟମ ସଂସ୍ଥାର ପ୍ରଶ୍ନର କୌଣସି ଉତ୍ତର ଦେଇନାହିଁ।

ଏହି ରିପୋର୍ଟ ଏପରି ଏକ ସମୟରେ ଆସିଛି ଯେତେବେଳେ ଏଆଇର ସାମରିକ ବ୍ୟବହାର ଏବଂ ଏହାର ସମ୍ଭାବ୍ୟ ବିପଦ ବିଷୟରେ ତୀବ୍ର ବିତର୍କ ଚାଲିଛି। ଚଳିତ ମାସରେ ଏଆଇ କମ୍ପାନି ଆନ୍ଥ୍ରୋପିକ୍‌ର ଜଣେ ଗବେଷକ କମ୍ପାନି ଛାଡି ଦେଇଛନ୍ତି, ଏବଂ ଚିନ୍ତା ପ୍ରକାଶ କରିଛନ୍ତି ଯେ, ଏଆଇ ଆଗାମୀ ଦିନରେ ଅନିୟନ୍ତ୍ରିତ ହୋଇପାରେ। ଅନ୍ୟ ଜଣେ କର୍ମଚାରୀ ମଧ୍ୟ ସାର୍ବଜନୀନ ଭାବରେ କହିଛନ୍ତି, ଏଆଇ ମଣିଷଙ୍କର ମୃତ୍ୟୁର କାରଣ ହୋଇପାରେ। ଆଗାମୀ ୧୦ ବର୍ଷ ମଧ୍ୟରେ ଏପରି ହେବାର ସମ୍ଭାବନା ୧୦% ରୁ ଅଧିକ ରହିଛି।