ଗୁଜରାଟରୁ ବିଶ୍ୱ ଦରବାର: ଆକାଶ ଅମ୍ବାନୀଙ୍କ ହାତରେ ଜିଓର ନୂଆ ଅଧ୍ୟାୟ!

ଧୀରୁଭାଇଙ୍କ ସେୟାର ବିପ୍ଳବ ପରେ ଏବେ ତୃତୀୟ ପିଢ଼ିରେ ଜିଓ ପ୍ଲାଟଫର୍ମସର ଆଇପିଓ ପ୍ରସ୍ତୁତି; ୫୦ ବର୍ଷ ପରେ ଗୁଜରାଟ ମାଟିରୁ ଆରମ୍ଭ ହେଉଛି ଡିଜିଟାଲ୍ ସଫଳତାର ନୂଆ ଇତିହାସ। 

 ଗୋଟିଏ ପରିବାର, ତିନୋଟି ପିଢ଼ି... ଆଉ ଗୋଟିଏ ବିଶାଳ ସ୍ୱପ୍ନ! ୧୯୭୭ ମସିହାରେ ଆରମ୍ଭ ହୋଇଥିବା ଯେଉଁ ବ୍ୟବସାୟିକ ଯାତ୍ରା ସାଧାରଣ ଭାରତୀୟଙ୍କ ଭାଗ୍ୟ ବଦଳାଇ ଦେଇଥିଲା, ତାହା ପାଖାପାଖି ୫୦ ବର୍ଷ ପରେ ପୁଣି ଫେରିଆସିଛି ନିଜ ଜନ୍ମମାଟି ଗୁଜରାଟକୁ! ଧୀରୁଭାଇ ଅମ୍ବାନୀଙ୍କ ଅଦମ୍ୟ ସାହସ ଏବଂ ମୁକେଶ ଅମ୍ବାନୀଙ୍କ ବିଶାଳ ସଫଳତା ପରେ, ଏବେ ତୃତୀୟ ପିଢ଼ିର ଯୁବ ଚେହେରା ଆକାଶ ଅମ୍ବାନୀଙ୍କ ନେତୃତ୍ୱରେ ବିଶ୍ୱ ଡିଜିଟାଲ୍ ବଜାରରେ ରାଜ୍ କରିବାକୁ ସଜବାଜ ହେଉଛି ‘ଜିଓ’। ପ୍ରତି ପିଢ଼ି ଆଗରେ ନିଜ ଦମ୍‌ରେ କିଛି ନୂଆ ଗଢ଼ିବାର ପ୍ରଶ୍ନ ଥାଏ, ଆଉ ଆକାଶଙ୍କ ପାଇଁ ସେହି ଗୌରବର ଉତ୍ତର ପାଲଟିଛି ଭାରତର ଡିଜିଟାଲ୍ ବିପ୍ଳବ।

ଗୁଜରାଟ ସର୍ବଦା ଏହି ବଡ଼ ପରିବର୍ତ୍ତନର ପ୍ରଥମ ସାକ୍ଷୀ ରହିଆସିଛି। ୨୦୨୨ ଶେଷ ଭାଗରେ ଜିଓ ପ୍ରଥମେ ଗୁଜରାଟର ସମସ୍ତ ୩୩ଟି ଯାକ ଜିଲ୍ଲା ମୁଖ୍ୟାଳୟରେ ୫ଜି (5G) ସେବା ପହଞ୍ଚାଇ ସହରରୁ ଗାଁ ଗହଳି ଯାଏଁ ସଂଯୋଗର ଏକ ନୂଆ ବିପ୍ଳବ ଆଣିଥିଲା। ଛାତ୍ରଛାତ୍ରୀ, କୃଷକ ଓ ଛୋଟ ବ୍ୟବସାୟୀଙ୍କ ହାତକୁ ପ୍ରଯୁକ୍ତିର ଶକ୍ତି ଟେକିଦେଇ ଆକାଶ ଅମ୍ବାନୀ ଆଜି ‘ଡିଜିଟାଲ୍ ଗୁଜରାଟ ନା ପ୍ରଣେତା’ ଭାବେ ପରିଚିତ ହୋଇଛନ୍ତି। ଆଜି ଜିଓ କେବଳ ଏକ ଟେଲିକମ୍ କମ୍ପାନି ନୁହେଁ, ବରଂ ୫୨ କୋଟିରୁ ଅଧିକ ଗ୍ରାହକଙ୍କ ସହ ବିଶ୍ୱର ଅନ୍ୟତମ ବୃହତ୍ତମ ଡିଜିଟାଲ୍ ନେଟୱାର୍କ। ଏଆଇ (AI), କ୍ଲାଉଡ୍ ସର୍ଭିସ୍ ଓ ସ୍ୱଦେଶୀ ଟେକ୍ନୋଲୋଜି ମାଧ୍ୟମରେ ବିଶ୍ୱ ପାଇଁ ନୂଆ ପ୍ରଯୁକ୍ତି ଗଢ଼ିବା ଏବେ ଜିଓର ଲକ୍ଷ୍ୟ ପାଲଟିଛି।

ଠିକ୍ ଅର୍ଦ୍ଧଶତାବ୍ଦୀ ପୂର୍ବରୁ ୧୯୭୭ରେ ଧୀରୁଭାଇ ଅମ୍ବାନୀ ରିଲାଏନ୍ସକୁ ସେୟାର ବଜାରକୁ ଆଣି ସାଧାରଣ ଲୋକଙ୍କୁ କମ୍ପାନିର ମାଲିକ କରିଥିଲେ। ଆଜି ସେହି ଇତିହାସ ପୁଣି ଦୋହରାଇବାକୁ ଯାଉଛି, କାରଣ ଜିଓ ପ୍ଲାଟଫର୍ମସ୍ ଲିମିଟେଡ୍ ନିଜର ଆଇପିଓ (IPO) ପାଇଁ ପ୍ରସ୍ତୁତି ଚଳାଇଛି। ଏଠାରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି— ଜିଓ ପ୍ଲାଟଫର୍ମସର ପଞ୍ଜୀକୃତ କାର୍ଯ୍ୟାଳୟ ରହିଛି ଅହମ୍ମଦାବାଦରେ। ନରୋଦାର ଏକ କପଡ଼ା କଳରୁ ଆରମ୍ଭ ହୋଇଥିବା ଯାତ୍ରା ଆଜି ପୁଣି ନିଜ ମାଟିକୁ ଫେରିଆସିଛି। ଫରକ କେବଳ ଏତିକି— ପୂର୍ବରୁ ବ୍ୟବସାୟ ଟେକ୍ସଟାଇଲ୍ ଓ ତୈଳ ବିଶୋଧନାଗାରର ଥିଲା, ଆଉ ଏଥର ବ୍ୟବସାୟ ହେଉଛି ଅତ୍ୟାଧୁନିକ ଡିଜିଟାଲ୍ ଟେକ୍ନୋଲୋଜିର।

ତିନି ପିଢ଼ିର ଯାତ୍ରାକୁ ଦେଖିଲେ ଗୋଟିଏ କଥା ସ୍ପଷ୍ଟ ହୁଏ। ଧୀରୁଭାଇ ଶିଳ୍ପ ଜଗତରେ ସାଧାରଣ ଲୋକଙ୍କୁ ଯୋଡ଼ିଥିଲେ, ମୁକେଶ ଅମ୍ବାନୀ ଜାମନଗରକୁ ବିଶ୍ୱ ଶକ୍ତି ହବ୍ କରି ଦେଶର ସାମର୍ଥ୍ୟ ପ୍ରମାଣିତ କଲେ, ଆଉ ଆକାଶ ଅମ୍ବାନୀ ଭାରତକୁ ବିଶ୍ୱ ପ୍ରଯୁକ୍ତିର ଅଗ୍ରଣୀ ନିର୍ମାତା ଭାବେ ଗଢ଼ିତୋଳିବାକୁ ବାହାରିଛନ୍ତି। ଅସ୍ତ୍ର ବଦଳିଛି— ସେୟାରରୁ ରିଫାଇନାରୀ ଏବଂ ରିଫାଇନାରୀରୁ ଡାଟା; କିନ୍ତୁ ବିଶ୍ୱାସ ସେୟା ରହିଛି ଯେ ସାଧାରଣ ନାଗରିକଙ୍କ ସହଭାଗିତାରେ ହିଁ ଦେଶର ପ୍ରକୃତ ପ୍ରଗତି ସମ୍ଭବ। ୫୦ ବର୍ଷ ପରେ ଆରମ୍ଭ ହେଉଥିବା ଏହି ନୂଆ ଅଧ୍ୟାୟ ଭାରତୀୟ ଅର୍ଥନୀତିକୁ ପୁଣି ଏକ ନୂଆ ଶିଖରକୁ ନେଇଯିବ।