ଲାଡେନକୁ ଯୋଦ୍ଧା କହିଥିବା ପାକିସ୍ତାନୀ ଧର୍ମଗୁରୁ ହୁତିଙ୍କୁ କହିଲେ ଆତଙ୍କବାଦୀ

ସାଉଦି ଆରବ ଏବଂ ୟେମେନର ହୁତି ବିଦ୍ରୋହୀଙ୍କ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି। ଏହି ସମୟରେ ଜଣେ ପାକିସ୍ତାନୀ ଧର୍ମଗୁରୁଙ୍କ ମନ୍ତବ୍ୟ ଏହି ଯୁଦ୍ଧକୁ ନେଇ ଏକ ନୂତନ ବିବାଦ ସୃଷ୍ଟି କରିଛି 

ସାଉଦି ଆରବ ଏବଂ ୟେମେନର ହୁତି ବିଦ୍ରୋହୀଙ୍କ ମଧ୍ୟରେ ଉତ୍ତେଜନା ଶୀର୍ଷରେ ପହଞ୍ଚିଛି। ଏହି ସମୟରେ ଜଣେ ପାକିସ୍ତାନୀ ଧର୍ମଗୁରୁଙ୍କ ମନ୍ତବ୍ୟ ଏହି ଯୁଦ୍ଧକୁ ନେଇ ଏକ ନୂତନ ବିବାଦ ସୃଷ୍ଟି କରିଛି। ପାକିସ୍ତାନୀ ଧର୍ମଗୁରୁଙ୍କ ଅନୁଯାୟୀ, ହୁତିମାନେ ଆତଙ୍କବାଦୀ ଏବଂ ଇସଲାମ ସହିତ ସେମାନଙ୍କର କୌଣସି ସମ୍ପର୍କ ନାହିଁ। ଧର୍ମଗୁରୁଙ୍କ ଏହି ମନ୍ତବ୍ୟ ଅନ୍ତର୍ଜାତୀୟ ସ୍ତରରେ ଏକ ନୂତନ ବିତର୍କ ସୃଷ୍ଟି କରିଛି।

ପାକିସ୍ତାନ ଉଲେମା ପରିଷଦର ମୁଖ୍ୟ ହାଫିଜ୍ ମହମ୍ମଦ ତାହିର ଆଶରଫି ସାଉଦି ଆରବରେ ଏକ ଅନ୍ତର୍ଜାତୀୟ ସମ୍ମିଳନୀରେ ଉଦବୋଧନ ଦେଇ ଏଭଳି କହିଛନ୍ତି। ସେ ସାଉଦି ଆରବର ସୁରକ୍ଷାକୁ ପାକିସ୍ତାନ ପାଇଁ ଏକ ଲାଲ ରେଖା ଭାବରେ ବର୍ଣ୍ଣନା କରି କହିଛନ୍ତି ଯେ, ପାକିସ୍ତାନ ସରକାର, ସେନା, ଉଲେମା ଏବଂ ଜନସାଧାରଣ ସାଉଦି ଆରବ ସହିତ ଠିଆ ହୋଇଛନ୍ତି। ସାଉଦି ଆରବର ଶତ୍ରୁ ଇସଲାମ ଏବଂ ମୁସଲମାନମାନଙ୍କର ମଧ୍ୟ ଶତ୍ରୁ।

ସାଉଦି ଆରବ ଏବଂ ହୁତିମାନଙ୍କ ମଧ୍ୟରେ ଚାଲିଥିବା ଯୁଦ୍ଧ ସମ୍ପର୍କରେ ହାଫିଜ୍ ମହମ୍ମଦ ତାହିର ଆଶରଫି କହିଛନ୍ତି ଯେ, ଏହା ସିଆ ଏବଂ ସୁନ୍ନି ମଧ୍ୟରେ ଯୁଦ୍ଧ ନୁହେଁ, କିମ୍ବା ଏହା ଦୁଇଟି ଦେଶ ମଧ୍ୟରେ ଯୁଦ୍ଧ ନୁହେଁ। ସେ କହିଛନ୍ତି, ଏହା ଏକ ଦଳ ଏବଂ ଆତଙ୍କବାଦୀ ସଂଗଠନ ମଧ୍ୟରେ ଯୁଦ୍ଧ। ସମ୍ମିଳନୀରେ ଆଶରଫି ପାକିସ୍ତାନ, ସାଉଦି ଆରବ ଏବଂ ତୁର୍କୀ ମଧ୍ୟରେ ପ୍ରତିରକ୍ଷା ଚୁକ୍ତିନାମାକୁ ପ୍ରଶଂସା କରି ଏହାକୁ ତିନୋଟି ଦେଶ ପାଇଁ ଗୁରୁତ୍ୱପୂର୍ଣ୍ଣ ବୋଲି କହିଛନ୍ତି।

ଗଣମାଧ୍ୟମ ରିପୋର୍ଟ ଅନୁସାରେ, ପାକିସ୍ତାନ ଉଲେମା ପରିଷଦର ମୁଖ୍ୟ ହାଫିଜ୍ ମହମ୍ମଦ ତାହିର ଆଶ୍ରଫି ହେଉଛନ୍ତି ସେହି ବ୍ୟକ୍ତି ଯିଏ ୨୦୦୭ ମସିହାରେ ଓସାମା ବିନ୍ ଲାଡେନକୁ ପ୍ରଶଂସା କରି ତାଙ୍କୁ ଇସଲାମର ଜଣେ ପ୍ରକୃତ ଯୋଦ୍ଧା ବୋଲି କହିଥିଲେ। ଆଶ୍ରଫି ବିନ୍ ଲାଡେନଙ୍କୁ ‘ସୈଫୁଲ୍ଲାହ’ ଉପାଧି ଦେବାକୁ ଆହ୍ୱାନ କରିଥିଲେ, ଯାହାର ଅର୍ଥ ‘ଆଲ୍ଲାହଙ୍କର ଖଣ୍ଡା’। ଆଶ୍ରଫି ପାକିସ୍ତାନରେ ଈଶାନିନ୍ଦା ଆଇନର ଜଣେ ବଡ଼ ସମର୍ଥକ। ସେଥିପାଇଁ ତାଙ୍କୁ ପ୍ରାୟତଃ ସମାଲୋଚନାର ସମ୍ମୁଖୀନ ହେବାକୁ ପଡ଼ିଥାଏ।