ଟ୍ରମ୍ପଙ୍କ H-1B ଭିସା କଟକଣା: ଭାରତୀୟଙ୍କ ଚାକିରି ଉପରେ କ’ଣ ପଡ଼ିବ ପ୍ରଭାବ?

H-1B ଭିସା ବ୍ୟବସ୍ଥାକୁ ନେଇ ଟ୍ରମ୍ପ ପ୍ରଶାସନ କଟକଣା ଆହୁରି ବଢ଼ାଇଛି। କିଛି ନୂଆ H-1B ଆବେଦନ ପାଇଁ ୧ ଲକ୍ଷ ଡଲାରର ଅର୍ଥପ୍ରଦାନ ବ୍ୟବସ୍ଥାକୁ ୨୦୨୭ ସେପ୍ଟେମ୍ବର ପର୍ଯ୍ୟନ୍ତ ବଢ଼ାଯାଇଛି।

H-1B ଲାଭାର୍ଥୀଙ୍କ ମଧ୍ୟରେ ଭାରତୀୟଙ୍କ ଅଂଶ ୭୧ ପ୍ରତିଶତ ଥିବାରୁ ଏହି ନୀତି ଭାରତୀୟ ପେସାଦାରଙ୍କ ପାଇଁ ଗୁରୁତ୍ୱ ବହନ କରୁଛି। 

ଆମେରିକାରେ ଚାକିରି କରିବାକୁ ଆଶା ରଖିଥିବା ଭାରତୀୟ ପେସାଦାରଙ୍କ ପାଇଁ H-1B ଭିସାକୁ ନେଇ ଆଉ ଏକ ବଡ଼ ପରିବର୍ତ୍ତନ ଆସିଛି । ଡୋନାଲ୍ଡ ଟ୍ରମ୍ପ ପ୍ରଶାସନ କିଛି ନୂଆ H-1B ଆବେଦନ ଉପରେ ୧ ଲକ୍ଷ ଡଲାରର ଅତିରିକ୍ତ ଅର୍ଥପ୍ରଦାନ ବ୍ୟବସ୍ଥାକୁ ଆଉ ୧୨ ମାସ ପାଇଁ ବଢ଼ାଇଛି । ନୂଆ ଘୋଷଣା ଅନୁସାରେ ଏହି କଟକଣା ୨୦୨୭ ସେପ୍ଟେମ୍ବର ୨୧ ପର୍ଯ୍ୟନ୍ତ ଜାରି ରହିବ । H-1B ଭିସା ଆମେରିକାରେ ଉଚ୍ଚଦକ୍ଷତା ଆବଶ୍ୟକ କାମ ପାଇଁ ବିଦେଶୀ ପେସାଦାରଙ୍କୁ ନିଯୁକ୍ତି ଦେବାର ଏକ ପ୍ରମୁଖ ବ୍ୟବସ୍ଥା। ଏହାର ବଡ଼ ଅଂଶ ଭାରତୀୟ ପେସାଦାରଙ୍କ ସହ ଜଡ଼ିତ । USCISର FY 2024 ତଥ୍ୟ ଅନୁସାରେ ଅନୁମୋଦିତ H-1B ପିଟିସନ୍‌ର ୭୧ ପ୍ରତିଶତ ଲାଭାର୍ଥୀ ଭାରତରେ ଜନ୍ମଗ୍ରହଣ କରିଥିଲେ। ଚୀନ୍ ପ୍ରାୟ ୧୨ ପ୍ରତିଶତ ସହ ଦ୍ୱିତୀୟ ସ୍ଥାନରେ ଥିଲା ।

କାହିଁକି କଡ଼ା ହେଉଛି H-1B ନିୟମ?

ଟ୍ରମ୍ପ ପ୍ରଶାସନର ଯୁକ୍ତି ହେଉଛି, କିଛି ନିଯୁକ୍ତିଦାତା ଓ IT ଆଉଟସୋର୍ସିଂ କମ୍ପାନୀ H-1B ବ୍ୟବସ୍ଥାର ଦୁରୁପଯୋଗ କରି ତୁଳନାମୂଳକ କମ୍ ବେତନରେ ବିଦେଶୀ କର୍ମଚାରୀ ନିଯୁକ୍ତ କରୁଛନ୍ତି। ସରକାର କହିଛି, ଏହା ଆମେରିକୀୟ କର୍ମଚାରୀଙ୍କ ଚାକିରି ଓ ବେତନ ଉପରେ ପ୍ରଭାବ ପକାଇପାରେ। ଏହି କାରଣରୁ ନୂଆ ଆବେଦନରେ ଭାରି ଅର୍ଥପ୍ରଦାନ ବ୍ୟବସ୍ଥା ସହିତ ନିଯୁକ୍ତିଦାତାଙ୍କ ଦ୍ୱାରା ଆମେରିକୀୟ କର୍ମଚାରୀଙ୍କ ଛଟନୀ ହୋଇଛି କି ନାହିଁ, ତାହାକୁ ମଧ୍ୟ ବିଚାରକୁ ନେବାକୁ ନିର୍ଦ୍ଦେଶ ଦିଆଯାଇଛି ।

ଭାରତୀୟଙ୍କ ଉପରେ କ’ଣ ପ୍ରଭାବ?

H-1B ଭିସାରେ ଭାରତୀୟଙ୍କ ଅଂଶ ବହୁତ ଅଧିକ ଥିବାରୁ ନୂଆ ନିୟମର ପ୍ରଭାବ ଭାରତୀୟ ପେସାଦାର ଓ ସେମାନଙ୍କୁ ନିଯୁକ୍ତି ଦେଉଥିବା କମ୍ପାନୀ ଉପରେ ପଡ଼ିପାରେ। ବିଶେଷକରି ଆମେରିକା ବାହାରେ ଥିବା ନୂଆ ଆବେଦନକାରୀଙ୍କ ପାଇଁ ୧ ଲକ୍ଷ ଡଲାରର ଅତିରିକ୍ତ ଖର୍ଚ୍ଚ ନିଯୁକ୍ତିଦାତାଙ୍କ ନିଷ୍ପତ୍ତିକୁ ପ୍ରଭାବିତ କରିପାରେ । ତେବେ ଏହାକୁ ସମସ୍ତ H-1B ଧାରକଙ୍କ ଉପରେ ସିଧାସଳଖ ଲାଗୁ ହେଉଥିବା ନିୟମ ଭାବେ ଦେଖିବା ଠିକ୍ ନୁହେଁ ।

ଆଇନଗତ ଲଢ଼େଇ ମଧ୍ୟ ଜାରି

୧ ଲକ୍ଷ ଡଲାର ଫି’କୁ ନେଇ ଆମେରିକାରେ ଆଇନଗତ ବିବାଦ ମଧ୍ୟ ଚାଲିଛି । ଏକ ଫେଡେରାଲ୍ ଜଜ୍ ଏହି ଫି’କୁ ବେଆଇନ ବୋଲି ରାୟ ଦେଇ ସରକାରଙ୍କୁ ଏହା ସଂଗ୍ରହ କରିବାରୁ ରୋକିଥିଲେ । ଟ୍ରମ୍ପ ପ୍ରଶାସନ ଏହି ରାୟ ବିରୋଧରେ ଆପିଲ୍ କରିଛି ଏବଂ ମାମଲା ଆପିଲ୍ କୋର୍ଟରେ ବିଚାରାଧୀନ ରହିଛି। ତେଣୁ ଏହି ନିୟମର ଦୀର୍ଘକାଳୀନ ଆଇନଗତ ସ୍ଥିତି ଏବେ ମଧ୍ୟ ସ୍ପଷ୍ଟ ନୁହେଁ ।