ରାହୁଲ ଗାନ୍ଧୀଙ୍କ ଆବେଦନରେ ୧୪ଟି ତ୍ରୁଟି, ସୁପ୍ରିମକୋର୍ଟ ରେଜିଷ୍ଟ୍ରିର ଆପତ୍ତି

ଭୋଟର ତାଲିକାରୁ ନାଁ କାଟିବା ଏବଂ ନିର୍ବାଚନୀ ପ୍ରକ୍ରିୟାରେ ଅନିୟମିତତା ଅଭିଯୋଗକୁ ନେଇ ସୁପ୍ରିମକୋର୍ଟ ଯାଇଥିଲେ ରାହୁଲ ଗାନ୍ଧୀଙ୍କ ସମେତ ବିରୋଧୀ ଦଳର ୧୧ ଜଣ ନେତା । କିନ୍ତୁ ଶୁଣାଣି ପୂର୍ବରୁ ଆବେଦନରେ ୧୪ଟି ତ୍ରୁଟି ଥିବା ଦର୍ଶାଇଛି ସୁପ୍ରିମକୋର୍ଟ ରେଜିଷ୍ଟ୍ରି । 

 ଭୋଟର ତାଲିକାରୁ ନାଁ କାଟିବା ଏବଂ ନିର୍ବାଚନୀ ପ୍ରକ୍ରିୟାରେ ଅନିୟମିତତା ଅଭିଯୋଗକୁ ନେଇ ସୁପ୍ରିମକୋର୍ଟ ଯାଇଥିଲେ ରାହୁଲ ଗାନ୍ଧୀଙ୍କ ସମେତ ବିରୋଧୀ ଦଳର ୧୧ ଜଣ ନେତା । କିନ୍ତୁ ଶୁଣାଣି ପୂର୍ବରୁ ଆବେଦନରେ ୧୪ଟି ତ୍ରୁଟି ଥିବା ଦର୍ଶାଇଛି ସୁପ୍ରିମକୋର୍ଟ ରେଜିଷ୍ଟ୍ରି । ଆବଶ୍ୟକ କାଗଜପତ୍ରର ଅଭାବଠାରୁ ଆରମ୍ଭ କରି କୋର୍ଟ ଫି’ରେ ୨୨୦ ଟଙ୍କାର ଅଭାବ ପର୍ଯ୍ୟନ୍ତ ବିଭିନ୍ନ ତ୍ରୁଟି ସାମ୍ନାକୁ ଆସିଛି । 

କଂଗ୍ରେସ ସାଂସଦ ରାହୁଲ ଗାନ୍ଧୀ ଏବଂ ଅନ୍ୟ ୧୦ ଜଣ ବିରୋଧୀ ନେତା ନିର୍ବାଚନ କମିଶନଙ୍କ ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ ବା ଏସ୍‌ଆଇଆର୍‌ ପ୍ରକ୍ରିୟାକୁ ନେଇ ସୁପ୍ରିମକୋର୍ଟରେ ଏହି ଆବେଦନ କରିଛନ୍ତି । ଭୋଟର ତାଲିକାରୁ ନାଁ କାଟିବା ପ୍ରକ୍ରିୟାର ସ୍ୱାଧୀନ ଯାଞ୍ଚ ଏବଂ ଏଥିରେ ସ୍ୱଚ୍ଛତା ଆଣିବାକୁ ଦାବି କରିଛନ୍ତି ଆବେଦନକାରୀ ।

କେଉଁ କେଉଁ ତ୍ରୁଟି ଦର୍ଶାଇଛି ରେଜିଷ୍ଟ୍ରି?

ଆବେଦନ ସହ କିଛି ଆଇନଜୀବୀଙ୍କ ଅନୁମତିପତ୍ର ବା ଭକାଲତନାମା ନଥିବା କିମ୍ବା ସେଥିରେ ଦସ୍ତଖତ ନଥିବା ଦର୍ଶାଯାଇଛି । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ପରିଚୟପତ୍ରର ସ୍ପଷ୍ଟ ନକଲ ମଧ୍ୟ ଦାଖଲ କରିବାକୁ କୁହାଯାଇଛି । ଏହାସହ ନିର୍ବାଚନ କମିଶନଙ୍କ ଦ୍ୱାରା ୨୦୨୫ ଜୁନ୍ ୨୪ରେ ଏସ୍‌ଆଇଆର୍‌ ଆରମ୍ଭ କରିବା ସଂପର୍କିତ ନିଷ୍ପତ୍ତିର ଡିଜିଟାଲ୍ କପି ଏବଂ ଅନ୍ୟାନ୍ୟ ଦସ୍ତାବିଜ ଦାଖଲ କରିବାକୁ କୁହାଯାଇଛି । ଏହାଛଡ଼ା ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ଏବଂ ଅନ୍ୟ ଦୁଇ ନିର୍ବାଚନ କମିଶନରଙ୍କୁ ଏହି ମାମଲାରେ ବ୍ୟକ୍ତିଗତ ପକ୍ଷ ଭାବେ କାହିଁକି ସାମିଲ କରାଯାଇଛି, ସେନେଇ ମଧ୍ୟ ସ୍ପଷ୍ଟୀକରଣ ଲୋଡ଼ିଛି ରେଜିଷ୍ଟ୍ରି ।

କ’ଣ ଦାବି କରିଛନ୍ତି ବିରୋଧୀ ନେତା?

ଭୋଟର ତାଲିକାରୁ ନାଁ କାଟିବା ଏବଂ ସଂଶୋଧନ ପ୍ରକ୍ରିୟାର ଯାଞ୍ଚ ପାଇଁ ସୁପ୍ରିମକୋର୍ଟର ଜଣେ ଅବସରପ୍ରାପ୍ତ ବିଚାରପତିଙ୍କ ନେତୃତ୍ୱରେ ଏକ ସ୍ୱାଧୀନ କମିଟି ଗଠନ କରିବାକୁ ଦାବି ହୋଇଛି । ଏହାସହ ଏସ୍‌ଆଇଆର୍‌ ପ୍ରକ୍ରିୟା ଉପରେ ଅନ୍ତରୀଣ ରୋକ୍ ଲଗାଇବା, କୌଣସି ଭୋଟରଙ୍କ ନାଁ କାଟିବା ପୂର୍ବରୁ ନୋଟିସ୍ ଦେବା ଏବଂ ନିଜ ପକ୍ଷ ରଖିବାକୁ ଯଥେଷ୍ଟ ସୁଯୋଗ ଦେବାକୁ ଆବେଦନରେ ଉଲ୍ଲେଖ କରାଯାଇଛି ।

ଅଧିକ ପଢ଼ନ୍ତୁ:ଜ୍ଞାନେଶ କୁମାରଙ୍କ ବିରୋଧରେ ଇଣ୍ଡି ମେଣ୍ଟର ପିଟିସନ୍; ଆଜି ସୁପ୍ରିମକୋର୍ଟରେ ହୋଇପାରେ ଶୁଣାଣି

ଏପରିକି ଭୋଟର ତାଲିକାରୁ କେତେ ଜଣଙ୍କ ନାଁ କଟାଯାଇଛି, କେଉଁ କାରଣରୁ କଟାଯାଇଛି ଏବଂ ବୟସ ଓ ଲିଙ୍ଗ ଅନୁସାରେ ଏହାର ତଥ୍ୟ ପ୍ରକାଶ କରିବାକୁ ମଧ୍ୟ ଦାବି କରିଛନ୍ତି ବିରୋଧୀ ନେତା । ପଞ୍ଜାବର ଭୋଟର ତାଲିକାକୁ ନେଇ ମଧ୍ୟ ଆବେଦନରେ ଉଦ୍‌ବେଗ ପ୍ରକାଶ କରାଯାଇଛି । ଆବେଦନ ଅନୁସାରେ, ୨୦୨୬ ଅଗଷ୍ଟ ୧୩ରେ ପ୍ରକାଶିତ ଡ୍ରାଫ୍ଟ ଭୋଟର ତାଲିକାରେ ପୂର୍ବରୁ ଥିବା ପ୍ରାୟ ୨ କୋଟି ୧୪ ଲକ୍ଷ ଭୋଟରଙ୍କ ମଧ୍ୟରୁ ପ୍ରାୟ ୨୦ ଲକ୍ଷ ୬୬ ହଜାର ନାଁ କମିଥିବା ଦାବି କରାଯାଇଛି ।

ତେବେ ଏଠାରେ ଗୁରୁତ୍ୱପୂର୍ଣ୍ଣ କଥା ହେଉଛି, ରେଜିଷ୍ଟ୍ରି ଦର୍ଶାଇଥିବା ଏହି ତ୍ରୁଟିଗୁଡ଼ିକ ଆବେଦନ ଦାଖଲ ସମ୍ବନ୍ଧୀୟ ପ୍ରକ୍ରିୟାଗତ ତ୍ରୁଟି । ଏହାକୁ ମାମଲାର ମୂଳ ଦାବି ଉପରେ ସୁପ୍ରିମକୋର୍ଟଙ୍କ ରାୟ ବୋଲି ଧରାଯାଇପାରିବ ନାହିଁ । ଏହି ତ୍ରୁଟିଗୁଡ଼ିକ ସୁଧାରିବା ପରେ ଆବେଦନଟି ଶୁଣାଣି ପାଇଁ ତାଲିକାଭୁକ୍ତ ହେବାର ପ୍ରକ୍ରିୟା ଆଗକୁ ବଢ଼ିପାରେ ।