କାନାଡା ପ୍ରଧାନମନ୍ତ୍ରୀ ଦୌଡରେ ଦୁଇ ଭାରତୀୟ ବଂଶୋଦ୍ଭବ

 ପ୍ରାୟ ଏକ ଦଶନ୍ଧି ଧରି ଶାସନ ପରେ ସୋମବାର ଇସ୍ତଫା ଦେଇଛନ୍ତି କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ। ଏହି କାରଣରୁ ରାଜନୈତିକ ମହଲରେ ତୀବ୍ର ହୋଇଛି ଉତ୍ତେଜନା । ତାଙ୍କ ଉତ୍ତରାଧିକାରୀଙ୍କ ବିଷୟରେ ମଧ୍ଯ ହେଉଛି ବିଭିନ୍ନ ଆଲୋଚନା। ଏହାରି ମଧ୍ଯରେ କିଏ ହେବ କାନାଡାର ପରବର୍ତ୍ତୀ ପ୍ରଧାନମନ୍ତ୍ରୀ,ଏନେଇ ଲିବରାଲ ପାର୍ଟିର ଜାତୀୟ କାର୍ଯ୍ୟକାରିଣୀ ନେବ ନିଷ୍ପତ୍ତି  । ଚଳିତ ସପ୍ତାହରେ ଏହି ବୈଠକ ହେବାର କାର୍ଯ୍ୟକ୍ରମ ରହିଥିବା ସୂଚନା ମିଳିଥିବା ବେଳେ ଲିବରାଲ ପାର୍ଟି ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପରବର୍ତ୍ତୀ ନେତା ଚୟନ ପାଇଁ ଅତି କମରେ ଲାଗିବ  ୩ ମାସ ସମୟ ।ତେବେ ସବୁଠୁ ବଡ କଥା ହେଉଛି, ପ୍ରଧାନମନ୍ତ୍ରୀ ଭାବେ ପ୍ରତିଦ୍ବନ୍ଦ୍ବିତା କରିବାକୁ ଥିବା ଅନେକ ଚର୍ଚ୍ଚିତ ପ୍ରାର୍ଥୀଙ୍କ ମଧ୍ୟରେ ରହିଛି ଦୁଇ ଭାରତୀୟ ବଂଶୋଦ୍ଭବଙ୍କ ନାଁ । ସେମାନେ ହେଉଛନ୍ତି  ଅନୀତା ଆନନ୍ଦ ଏବଂ ଜର୍ଜ ଚହଲ  । ଅନିତା ଆନନ୍ଦ କାନାଡା ସରକାରରେ ସମ୍ଭାଳିଥିଲେ ପରିବହନ ମନ୍ତ୍ରାଳୟ ଦାୟିତ୍ବ  । ତାଙ୍କର ପବ୍ଲିକ୍ ସର୍ଭିସେସ୍ ଏବଂ ପ୍ରୋକ୍ୟୁରମେଣ୍ଟ, ପ୍ରତିରକ୍ଷା ବିଭାଗର ରହିଛି ଅଭିଜ୍ଞତା  । ସେହିପରି ଲିବେରାଲ ପାର୍ଟିରୁ ଅଲବର୍ଟାର ସାଂସଦ ଅଛନ୍ତି ଚହଲ । ପ୍ରଧାନମନ୍ତ୍ରୀ ପଦ ପାଇଁ ସେ ମଧ୍ଯ ଅଛନ୍ତି ଇଚ୍ଛୁକ ।ତାଙ୍କୁ କାନାଡର ଶିଖ ସଂମ୍ପ୍ରଦାୟ ପକ୍ଷରୁ ଅଛି ଜୋରଦାର ସମର୍ଥନ ।  ଯଦି ଏ ଦୁହିଁଙ୍କ ମଧ୍ଯରୁ ଜଣେ କେହି କାନାଡାର ପ୍ରଧାନମନ୍ତ୍ରୀ ହୁଅନ୍ତି, ତେବେ ଆଶା କରାଯାଇପାରେ ଯେ ପୁଣି ଭଲ ହୋଇପାରେ ଭାରତ ସହିତ କାନାଡାର ସମ୍ପର୍କ , ଯାହା ଟ୍ରୁଡୋଙ୍କ ସମୟରେ ହୋଇଯାଇଥିଲା ଖରାପ ।