ମଇଦା ବିନା ପିଜ୍ଜାର ମଜା , ଘରେ ବନାନ୍ତୁ ସ୍ୱାଦିଷ୍ଟ ବେସନ ଚିଲ୍ଲା ପିଜ୍ଜା

ନାସ୍ତାରେ କିଛି ନୂଆ ଏବଂ ସ୍ୱାଦିଷ୍ଟ ଖାଇବାକୁ ଚାହୁଁଛନ୍ତି କି? ତେବେ ଆପଣ ଘରେ ତିଆରି କରିପାରିବେ ବେସନ ଚିଲ୍ଲା ପିଜ୍ଜା । ଏଥିରେ ମଇଦା ବ୍ୟବହାର ହୁଏ ନାହିଁ । ବେସନରେ ପ୍ରସ୍ତୁତ ଚିଲ୍ଲାକୁ ପିଜ୍ଜା ବେସ୍‌ ଭାବେ ବ୍ୟବହାର କରି ଏହା ଉପରେ ପନିପରିବା ଓ ଚିଜ୍‌ ଦିଆଯାଏ । 

ନାସ୍ତାରେ କିଛି ନୂଆ, ସ୍ୱାଦିଷ୍ଟ ଓ ଘରେ ସହଜରେ ପ୍ରସ୍ତୁତ ହୋଇପାରୁଥିବା ଖାଦ୍ୟ ଖାଇବାକୁ ଚାହୁଁଛନ୍ତି କି? ତେବେ ଏଥର ଘରେ ନିଶ୍ଚୟ ଟ୍ରାଏ କରନ୍ତୁ ବେସନ ଚିଲ୍ଲା ପିଜ୍ଜା। ପିଜ୍ଜାର ସ୍ୱାଦ ଓ ଚିଲ୍ଲାର ଦେଶୀ ଟ୍ୱିଷ୍ଟ—ଦୁଇଟିର ମଜା ଗୋଟିଏ ରେସିପିରେ।

ସବୁଠାରୁ ବଡ଼ କଥା ହେଉଛି, ଏହି ରେସିପିରେ ମଇଦା ବ୍ୟବହାର ହୁଏ ନାହିଁ। ବେସନରେ ପ୍ରସ୍ତୁତ ଚିଲ୍ଲାକୁ ପିଜ୍ଜା ବେସ୍‌ ଭାବେ ବ୍ୟବହାର କରାଯାଏ ଏବଂ ଏହା ଉପରେ ପନିପରିବା ଓ ଚିଜ୍‌ ଦେଇ ପ୍ରସ୍ତୁତ କରାଯାଏ ଏକ ସ୍ୱାଦିଷ୍ଟ ଦେଶୀ ପିଜ୍ଜା। ଏହି ଟେଷ୍ଟି ନାସ୍ତା ପାଇଁ ପ୍ରଥମେ ଦେଢ଼ କପ୍‌ ବେସନ ନିଅନ୍ତୁ। ଏଥିରେ ହଳଦୀ, ଲଙ୍କା ଗୁଣ୍ଡ, ଜିରା ଗୁଣ୍ଡ, ଧନିଆ ଗୁଣ୍ଡ, ଚାଟ୍‌ ମସଲା ଏବଂ ସ୍ୱାଦ ଅନୁସାରେ ଲୁଣ ମିଶାନ୍ତୁ।

ଏବେ ଅଳ୍ପ ଅଳ୍ପ କରି ପାଣି ଦେଇ ଏକ ଚିକ୍କଣ ଓ ଗାଢ଼ ବ୍ୟାଟର ପ୍ରସ୍ତୁତ କରନ୍ତୁ। ବ୍ୟାଟରରେ ଯେପରି କୌଣସି ଗୁଣ୍ଡା ନ ରହେ, ସେଥିପ୍ରତି ବିଶେଷ ଧ୍ୟାନ ଦିଅନ୍ତୁ। ଏହାପରେ ଏକ ତାୱାକୁ ମଧ୍ୟମ ଆଞ୍ଚରେ ଗରମ କରି ଅଳ୍ପ ତେଲ ଲଗାନ୍ତୁ। ଏକ କଡ଼ଚି ବେସନ ବ୍ୟାଟର ତାୱାରେ ପକାଇ ଗୋଲାକାର ଭାବେ ଚିଲ୍ଲା ଭଳି ଫାଟାଇ ଦିଅନ୍ତୁ।

ଆଞ୍ଚ କମ୍‌ କରି ଚିଲ୍ଲାଟିକୁ ଭଲ ଭାବେ ସିଝିବାକୁ ଦିଅନ୍ତୁ। ଗୋଟିଏ ପଟ ସୁନେଲି ରଙ୍ଗର ହୋଇଗଲେ ଏହାକୁ ପଲଟାଇ ଅନ୍ୟ ପଟକୁ ମଧ୍ୟ ଭଲ ଭାବେ ସିଝାନ୍ତୁ।ଚିଲ୍ଲା ପ୍ରସ୍ତୁତ ହୋଇଗଲେ ଏହାକୁ ପୁଣି ପଲଟାଇ ଉପର ପଟେ ଟମାଟୋ କ୍ୟାଚ୍‌ଅପ୍‌ କିମ୍ବା ପିଜ୍ଜା ସସ୍‌ ଲଗାନ୍ତୁ। ଏହା ଉପରେ କଟା ପିଆଜ, ଟମାଟୋ ଓ ସିମ୍ଲା ଲଙ୍କା ପକାନ୍ତୁ।ଆପଣ ଚାହିଲେ ଏଥିରେ ମକା, ସ୍ୱିଟ୍ କର୍ଣ୍ଣ, ଅଲିଭ୍ କିମ୍ବା ନିଜ ପସନ୍ଦର ଅନ୍ୟ ପନିପରିବା ମଧ୍ୟ ଦେଇପାରିବେ। ଏହା ରେସିପିର ସ୍ୱାଦକୁ ଆହୁରି ମଜାଦାର କରିଦେବ।

ଏହା ଉପରେ ମୋଜାରେଲା ଓ ପ୍ରୋସେସ୍‌ଡ ଚିଜ୍‌ ପକାଇ ତାୱାକୁ ଏକ ଢାଙ୍କଣାରେ ଘୋଡ଼ାଇ ଦିଅନ୍ତୁ। ଧୀମା ଆଞ୍ଚରେ କିଛି ସମୟ ରଖନ୍ତୁ, ଯାହାଦ୍ୱାରା ଚିଜ୍‌ ଧୀରେ ଧୀରେ ଭଲ ଭାବେ ତରଳିଯିବ। ଯେତେବେଳେ ଉପରେ ଥିବା ଚିଜ୍‌ ଭଲ ଭାବେ ତରଳିଯିବ ଏବଂ ପନିପରିବାର ସ୍ୱାଦ ଚିଲ୍ଲା ସହ ମିଶିଯିବ, ସେତେବେଳେ ପ୍ରସ୍ତୁତ ହୋଇଯିବ ଆପଣଙ୍କର ହଟ୍ ଆଣ୍ଡ ଟେଷ୍ଟି ବେସନ ଚିଲ୍ଲା ପିଜ୍ଜା।

ଏବେ ଗ୍ୟାସ୍‌ ବନ୍ଦ କରି ଏହାକୁ ପିଜ୍ଜା ଭଳି ଖଣ୍ଡ ଖଣ୍ଡ କରି କାଟନ୍ତୁ ଏବଂ ଗରମାଗରମ ପରଷନ୍ତୁ। ଏହାକୁ ଟମାଟୋ ସସ୍‌, ଗ୍ରୀନ୍ ଚଟଣି କିମ୍ବା ନିଜ ପସନ୍ଦର ଡିପ୍‌ ସହ ଖାଇପାରିବେ। ମଇଦା ବିନା ପ୍ରସ୍ତୁତ ହେଉଥିବା ଏହି ରେସିପି ସ୍ୱାଦରେ ପିଜ୍ଜାର ମଜା ଦେବା ସହ ଘରେ ଅଳ୍ପ ସମୟରେ ମଧ୍ୟ ପ୍ରସ୍ତୁତ କରିହେବ।ସକାଳ ନାସ୍ତା ହେଉ କି ସନ୍ଧ୍ୟାର ସ୍ନାକ୍ସ, ହଠାତ୍ ଘରକୁ ଅତିଥି ଆସିଲେ କିମ୍ବା ପିଲାମାନଙ୍କ ପାଇଁ କିଛି ନୂଆ ତିଆରି କରିବାକୁ ଚାହିଲେ—ଏହି ବେସନ ଚିଲ୍ଲା ପିଜ୍ଜା ହୋଇପାରେ ଏକ ମଜାଦାର ବିକଳ୍ପ।

ତେଣୁ ଆଉ ଅପେକ୍ଷା କାହିଁକି? ଘରେ ଥିବା ସାଧାରଣ ବେସନ ଓ କିଛି ପନିପରିବାରେ ତିଆରି କରନ୍ତୁ ଏହି ଦେଶୀ ଷ୍ଟାଇଲ୍ ପିଜ୍ଜା ଏବଂ ପରିବାର ସହ ଉପଭୋଗ କରନ୍ତୁ ଏହାର ଜବରଦସ୍ତ ସ୍ୱାଦ। ପିଲାଠାରୁ ବଡ଼ ପର୍ଯ୍ୟନ୍ତ ସମସ୍ତଙ୍କୁ ପସନ୍ଦ ଆସିବା ଭଳି ଏହି ରେସିପିକୁ ଆପଣ ନିଶ୍ଚୟ ଘରେ ଟ୍ରାଏ କରିପାରିବେ।