IAEA ପ୍ରସ୍ତାବକୁ କିମ୍ ୟୋ-ଜଙ୍ଗଙ୍କ ଖାରଜ ; ପରମାଣୁ ଶକ୍ତି ହ୍ରାସ କରିବ ନାହିଁ ଉତ୍ତର କୋରିଆ

ସେ କହିଛନ୍ତି ଯେ, ଆମେରିକା ଏବଂ ଅନ୍ୟାନ୍ୟ ଦେଶମାନଙ୍କ ପରମାଣୁ ଧମକ ମଧ୍ୟରେ ଉତ୍ତର କୋରିଆ ନିଜର ପରମାଣୁ କ୍ଷମତା ବଜାୟ ରଖିବ।ଗୁରୁବାର ଦିନ ଭିଏନାରେ ଅନୁଷ୍ଠିତ ୭୦ତମ ସାଧାରଣ ସମ୍ମିଳନୀରେ ଆନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି ଏହି ପ୍ରସ୍ତାବକୁ ଗ୍ରହଣ କରିଛି । 

ଉତ୍ତର କୋରିଆର ପରମାଣୁ କାର୍ଯ୍ୟକ୍ରମକୁ ସମାଲୋଚନା କରୁଥିବା ଜାତିସଂଘର ପରମାଣୁ ନୀରିକ୍ଷଣ ସଂସ୍ଥା(ଆଇଏଇଏ)ର ପ୍ରସ୍ତାବକୁ ଉତ୍ତର କୋରିଆର ନେତା କିମ୍ ଜୋଙ୍ଗ-ଉନଙ୍କ ଭଉଣୀ କିମ୍ ୟୋ-ଜଙ୍ଗ ଶନିବାର ପ୍ରତ୍ୟାଖ୍ୟାନ କରିଛନ୍ତି । ସେ କହିଛନ୍ତି ଯେ, ଆମେରିକା ଏବଂ ଅନ୍ୟାନ୍ୟ ଦେଶମାନଙ୍କ ପରମାଣୁ ଧମକ ମଧ୍ୟରେ ଉତ୍ତର କୋରିଆ ନିଜର ପରମାଣୁ କ୍ଷମତା ବଜାୟ ରଖିବ।ଗୁରୁବାର ଦିନ ଭିଏନାରେ ଅନୁଷ୍ଠିତ ୭୦ତମ ସାଧାରଣ ସମ୍ମିଳନୀରେ ଆନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି ଏହି ପ୍ରସ୍ତାବକୁ ଗ୍ରହଣ କରିଛି । ପ୍ରସ୍ତାବରେ ଦୋହରାଯାଇଥିଲା ଯେ ପରମାଣୁ ଅପ୍ରସାର ଚୁକ୍ତି (ଏନପିଟି) ଅନୁଯାୟୀ ଉତ୍ତର କୋରିଆକୁ ପରମାଣୁ ଅସ୍ତ୍ର ରାଷ୍ଟ୍ର ଭାବରେ ଘୋଷଣା କରାଯାଇପାରିବ ନାହିଁ। ଏହା ସହିତ ପ୍ୟୋଙ୍ଗୟାଙ୍ଗକୁ ପରମାଣୁ କାର୍ଯ୍ୟକ୍ରମ ସହିତ ଜଡିତ ସମସ୍ତ କାର୍ଯ୍ୟକଳାପ ତୁରନ୍ତ ବନ୍ଦ କରିବାକୁ ଆହ୍ୱାନ କରାଯାଇଛି ।

କିମ୍ ୟୋ-ଜଙ୍ଗ କହିଛନ୍ତି, ଆଇଏଇଏ ଉତ୍ତର କୋରିଆ ବିରୋଧରେ ଏହି ପ୍ରସ୍ତାବକୁ ବଳପୂର୍ବକ ଅନୁମୋଦନ କରିଛି । ଏହା ଆମ ଦେଶର ଆତ୍ମରକ୍ଷା ଏବଂ ବୈଧ ପରମାଣୁ କାର୍ଯ୍ୟକଳାପ ଉପରେ ପ୍ରଶ୍ନ ଉଠାଉଛି। ଏହା ଗମ୍ଭୀର ବାସ୍ତବତାକୁ ଅଣଦେଖା କରୁଛି ଯେ, ଆମର ସୁରକ୍ଷା ବାହାର ଦେଶର ପରମାଣୁ ବିପଦର ସମ୍ମୁଖୀନ ହେଉଛି । ଦୁଇ ଦିନ ପୂର୍ବେ, କିମ୍ ୟୋ-ଜଙ୍ଗ କହିଥିଲେ, ଏକ ପରମାଣୁ ଅସ୍ତ୍ର ରାଷ୍ଟ୍ର ଭାବରେ ଉତ୍ତର କୋରିଆର ସ୍ଥିତି ସମ୍ପୂର୍ଣ୍ଣ । ଏହାକୁ ପରିବର୍ତ୍ତନ କରାଯାଇପାରିବ ନାହିଁ । ସେ ଆଇଏଇଏକୁ ସମାଲୋଚନା କରି କହିଥିଲେ ଯେ, ଏହା ୟୁରୋପରେ ଆମେରିକାର ପରମାଣୁ ଅସ୍ତ୍ର ନିୟୋଜନ ଏବଂ ବିତରଣ ବିଷୟରେ କୌଣସି ଚିନ୍ତା ପ୍ରକାଶ କରିନାହିଁ ।

ସେ ଦକ୍ଷିଣ କୋରିଆ ଏବଂ ଜାପାନ ସହିତ ଆମେରିକାର ସୁରକ୍ଷା ବ୍ୟବସ୍ଥା ଉପରେ ମଧ୍ୟ ପ୍ରଶ୍ନ ଉଠାଇ କହିଥିଲେ, ଆମେରିକା ନିଜର ସହଯୋଗୀମାନଙ୍କୁ ସୁରକ୍ଷା ଦେବା ପାଇଁ ପରମାଣୁ ଅସ୍ତ୍ର ସମେତ ସାମରିକ ଶକ୍ତି ବ୍ୟବହାର କରିବା ବିଷୟରେ କଥାବାର୍ତ୍ତା କରୁଛି । କିମ୍ ୟୋ-ଜଙ୍ଗ ଦକ୍ଷିଣ କୋରିଆକୁ ପରମାଣୁ ବୁଡ଼ାଜାହାଜ ପ୍ରଯୁକ୍ତିବିଦ୍ୟା ଯୋଗାଇବା ପାଇଁ ଆମେରିକାର ଯୋଜନା ବିଷୟରେ ମଧ୍ୟ ଉଲ୍ଲେଖ କରିଥିଲେ । ଆଇଏଇଏ ଦୋହରା ମାନଦଣ୍ଡ ଗ୍ରହଣ କରିଥିବା କିମ୍ ଅଭିଯୋଗ କରିଛନ୍ତି। ଆଇଏଇଏ ଆମେରିକାର ସ୍ୱାର୍ଥ ପାଇଁ କାମ କରୁଥିବାର ମଧ୍ୟ ସେ ଅଭିଯୋଗ କରିଛନ୍ତି । ଉତ୍ତର କୋରିଆର ପରମାଣୁ କାର୍ଯ୍ୟକଳାପରେ ହସ୍ତକ୍ଷେପ କରିବାର ଆଇଏଇଏ କୌଣସି ଅଧିକାର ନାହିଁ। ବର୍ତ୍ତମାନର ଭୂରାଜନୈତିକ ପରିସ୍ଥିତି ଉତ୍ତର କୋରିଆକୁ ଅଧିକ ଦାୟିତ୍ୱପୂର୍ଣ୍ଣ ନିଷ୍ପତ୍ତି ନେବାକୁ ବାଧ୍ୟ କରୁଛି ବୋଲି କିମ୍ କହିଛନ୍ତି ।