ପ୍ରଥମେ କହିଲେ ଲଢ଼ିବେନି, ପୁଣି କହିଲେ ଲଢ଼ିବେ; ରେଜିନଗରରେ ମମତାଙ୍କ ପ୍ରାର୍ଥୀଙ୍କ ୟୁଟର୍ଣ୍ଣ

ରେଜିନଗର ଉପନିର୍ବାଚନରେ ମମତା ବନାର୍ଜୀଙ୍କ ଶିବିରର ପ୍ରାର୍ଥୀ ରବିଉଲ ଆଲମ ଚୌଧୁରୀ ପ୍ରଥମେ ମନୋନୟନ ପ୍ରତ୍ୟାହାର ଘୋଷଣା କରିଥିଲେ। ପରେ ମମତାଙ୍କ ସହ ଆଲୋଚନା ପରେ ସେ ପୁଣି ନିର୍ବାଚନ ଲଢ଼ିବା ନିଷ୍ପତ୍ତି ନେଇଛନ୍ତି। 

ପଶ୍ଚିମବଙ୍ଗର ରେଜିନଗର ଉପନିର୍ବାଚନକୁ ନେଇ ମମତା ବନାର୍ଜୀଙ୍କ ଶିବିରରେ ରାଜନୈତିକ ଘଟଣାକ୍ରମ ଲଗାତାର ବଦଳୁଛି । ଟିଏମସି ପ୍ରାର୍ଥୀ ରବିଉଲ ଆଲମ ଚୌଧୁରୀ ପ୍ରଥମେ ନିଜ ପ୍ରାର୍ଥିତ୍ୱ ପ୍ରତ୍ୟାହାର କରିବାକୁ ଘୋଷଣା କରିଥିଲେ । ତେବେ କିଛି ଘଣ୍ଟା ପରେ ସେ ପୁଣି ନିର୍ବାଚନ ଲଢ଼ିବେ ବୋଲି ଜଣାଇଛନ୍ତି । ମମତା ବନାର୍ଜୀଙ୍କ ସହ ଆଲୋଚନା ପରେ ସେ ନିଷ୍ପତ୍ତି ବଦଳାଇଥିବା କୁହାଯାଉଛି ।

ରବିଉଲ ପ୍ରଥମେ ମନୋନୟନ ପ୍ରତ୍ୟାହାରର କାରଣ ଭାବେ ନୂଆ ନିର୍ବାଚନୀ ପ୍ରତୀକକୁ ନେଇ ସମସ୍ୟା ଏବଂ ଦଳୀୟ କର୍ମୀଙ୍କ ଉପରେ ଚାପ ଥିବା କଥା କହିଥିଲେ । ନିର୍ବାଚନ କମିସନଙ୍କ ଅନ୍ତରୀଣ ନିଷ୍ପତ୍ତି ପରେ ମମତା ବନାର୍ଜୀଙ୍କ ଶିବିରକୁ ‘ମମତା ଅଲ୍ ଇଣ୍ଡିଆ ତୃଣମୂଳ କଂଗ୍ରେସ’ ନାମ ଏବଂ ‘ଫୁଟବଲ୍ ଖେଳାଳି’ ପ୍ରତୀକ ମିଳିଛି । ତେବେ ପରେ ରବିଉଲ ନିଜ ନିଷ୍ପତ୍ତି ଉପରେ ପୁଣି ବିଚାର କରିଥିଲେ । ମମତା ବନାର୍ଜୀଙ୍କ ସହ କଥା ହେବା ଏବଂ ପୋଲିସ ସୁରକ୍ଷା ମାଗିବା ପରେ ରେଜିନଗରରୁ ନିର୍ବାଚନ ଲଢ଼ିବାକୁ ସେ ରାଜି ହୋଇଥିବା ରିପୋର୍ଟରୁ ଜଣାପଡ଼ିଛି । 

ଏହା ଫଳରେ ଶନିବାର ସକାଳେ ସୃଷ୍ଟି ହୋଇଥିବା ଅନିଶ୍ଚିତତା ପରେ ତାଙ୍କ ପ୍ରାର୍ଥିତ୍ୱ ନେଇ ସ୍ଥିତି ପୁଣି ସ୍ପଷ୍ଟ ହୋଇଛି । ଏହାର ଗୋଟିଏ ଦିନ ପୂର୍ବରୁ ନନ୍ଦୀଗ୍ରାମରେ ମମତାଙ୍କ ଶିବିରର ପ୍ରାର୍ଥୀ ସଞ୍ଚିତା ପ୍ରଧାନ ମଧ୍ୟ ନିଜ ପ୍ରାର୍ଥିତ୍ୱ ପ୍ରତ୍ୟାହାର କରିଥିଲେ। ପରେ ମମତା ବନାର୍ଜୀଙ୍କ ଶିବିର ନନ୍ଦୀଗ୍ରାମରେ କଂଗ୍ରେସ ପ୍ରାର୍ଥୀଙ୍କୁ ସମର୍ଥନ କରିବା କଥା ଘୋଷଣା କରିଥିଲା। ରେଜିନଗରରେ ବିଜେପି ପକ୍ଷରୁ ଶଖାରାଓ ସରକାର ପ୍ରାର୍ଥୀ ହୋଇଛନ୍ତି । ରେଜିନଗର ଓ ନନ୍ଦୀଗ୍ରାମ ଉଭୟ ଆସନରେ ଅକ୍ଟୋବର ୬ରେ ଉପନିର୍ବାଚନ ହେବ ଏବଂ ଅକ୍ଟୋବର ୯ରେ ଭୋଟ୍ ଗଣତି ହେବ ।