ଏଫବିଆଇର ମୋଷ୍ଟ ୱାଣ୍ଟେଡ୍ ପଳାତକ ତାଲିକାରେ ଗୋଲ୍ଡି ବ୍ରାର: ସୂଚନା ପାଇଁ ୯ କୋଟି ଟଙ୍କାର ପୁରସ୍କାର ଘୋଷଣା

Nov 21, 2026 - 14:46
ଏଫବିଆଇର ମୋଷ୍ଟ ୱାଣ୍ଟେଡ୍ ପଳାତକ ତାଲିକାରେ ଗୋଲ୍ଡି ବ୍ରାର: ସୂଚନା ପାଇଁ ୯ କୋଟି ଟଙ୍କାର ପୁରସ୍କାର ଘୋଷଣା

ଆମେରିକା ଏବଂ କାନାଡାର ତଦନ୍ତ ଏଜେନ୍ସିଗୁଡ଼ିକ ଗ୍ୟାଙ୍ଗଷ୍ଟର ଗୋଲ୍ଡି ବ୍ରାରଙ୍କ ସନ୍ଧାନକୁ କଡ଼ାକଡ଼ି କରିଛନ୍ତି। ଆମେରିକା ଫେଡେରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (ଏଫବିଆଇ) ତାଙ୍କୁ ୧୦ ମୋଷ୍ଟ ୱାଣ୍ଟେଡ୍ ପଳାତକ ତାଲିକାରେ ସାମିଲ କରିଛି। 

 ଆମେରିକା ଏବଂ କାନାଡାର ତଦନ୍ତ ଏଜେନ୍ସିଗୁଡ଼ିକ ଗ୍ୟାଙ୍ଗଷ୍ଟର ଗୋଲ୍ଡି ବ୍ରାରଙ୍କ ସନ୍ଧାନକୁ କଡ଼ାକଡ଼ି କରିଛନ୍ତି। ଆମେରିକା ଫେଡେରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (ଏଫବିଆଇ) ତାଙ୍କୁ ୧୦ ମୋଷ୍ଟ ୱାଣ୍ଟେଡ୍ ପଳାତକ ତାଲିକାରେ ସାମିଲ କରିଛି। କାନାଡା ମଧ୍ୟ ତାଙ୍କୁ ଦେଶର ୨୫ ମୋଷ୍ଟ ୱାଣ୍ଟେଡ୍ ପଳାତକ ତାଲିକାର ଶୀର୍ଷରେ ରଖିଛି। ତାଙ୍କ ସମ୍ପର୍କରେ ସୂଚନା ପାଇଁ ଏଫବିଆଇ ୧ ନିୟୁତ ଆମେରିକୀୟ ଡଲାର ବା ପ୍ରାୟ ୯କୋଟି ୨୧ ଲକ୍ଷ ଟଙ୍କାର ପୁରସ୍କାର ଘୋଷଣା କରିଛି। 

କାନାଡାରେ ୱିନିପେଗ ପୁଲିସ ବିଭାଗ ତାଙ୍କ ସମ୍ପର୍କରେ ସୂଚନା ପ୍ରଦାନ ପାଇଁ ୨ ଲକ୍ଷ ୫୦ ହଜାର କାନାଡିୟ ଡଲାରର ପୁରସ୍କାର ଘୋଷଣା କରାଯାଇଛି। ଏଫବିଆଇ ୨୮ ସେପ୍ଟେମ୍ବର ୨୦୨୬ରେ ସତୀନ୍ଦରଜିତ ସିଂହ ଓରଫ ଗୋଲ୍ଡି ବ୍ରାରଙ୍କୁ ନିଜର ମୋଷ୍ଟ ୱାଣ୍ଟେଡ୍ ତାଲିକାରେ ସାମିଲ କରିଥିଲା। ସେ ତାଲିକାରେ ଯୋଡା ଯାଇଥିବା ୫୪୩ତମ ପଳାତକ। 

ଅନେକ ହିଂସାତ୍ମକ ଅପରାଧରେ ସମ୍ପୃକ୍ତି
ଆମେରିକୀୟ ଏଜେନ୍ସି ଅନୁଯାୟୀ, ଗୋଲ୍ଡି ଉତ୍ତର ଆମେରିକାରେ ଲରେନ୍ସ ବିଶ୍ନୋଇ ସଂଗଠିତ ଅପରାଧ ସିଣ୍ଡିକେଟର ମୁଖ୍ୟ ବୋଲି କୁହାଯାଉଛି। ଏହି ସିଣ୍ଡିକେଟ୍ ଉପରେ ଆମେରିକା ଏବଂ କାନାଡାରେ ଅନେକ ହିଂସାତ୍ମକ ଅପରାଧରେ ସମ୍ପୃକ୍ତି ଥିବା ଅଭିଯୋଗ ରହିଛି। ଏଫବିଆଇ ଅନୁଯାୟୀ, ଏହି ଅପରାଧଗୁଡ଼ିକରେ ରାଜନୈତିକ ଏବଂ ଧାର୍ମିକ ବ୍ୟକ୍ତିତ୍ୱଙ୍କ ଟାର୍ଗେଟେଡ୍ କିଲିଂ, ଗୁଳିକାଣ୍ଡ, ହତ୍ୟା, ଅପହରଣ, ଦାଦାବଟି ଆଦାୟ, ଆକ୍ରମଣ ଏବଂ ନିଶାଦ୍ରବ୍ୟ ଏବଂ ଅସ୍ତ୍ରଶସ୍ତ୍ର ଚାଲାଣ ଅନ୍ତର୍ଭୁକ୍ତ। ଆମେରିକୀୟ ଏଜେନ୍ସି ଗୋଲ୍ଡିଙ୍କୁ ଅତ୍ୟନ୍ତ ବିପଦପୂର୍ଣ୍ଣ ଭାବରେ ବର୍ଣ୍ଣନା କରିଛି।

ଅନେକ ଦେଶରେ ବିଶ୍ନୋଇ ଗ୍ୟାଙ୍ଗର ନେଟୱାର୍କ
ଆମେରିକୀୟ ତଦନ୍ତକାରୀ ସଂସ୍ଥା କହିଛି ଯେ, ୭ ଜୁଲାଇ ୨୦୨୬ରେ ଅପରେସନ୍ ହାର୍ଡବଲ୍ ଅଧୀନରେ ତିନୋଟି ଅନ୍ତର୍ଜାତୀୟ ସଂଗଠିତ ଅପରାଧ ସିଣ୍ଡିକେଟ୍ ସହିତ ଜଡିତ ୩୭ ଜଣ ସନ୍ଦିଗ୍ଧ ବ୍ୟକ୍ତିଙ୍କ ବିରୋଧରେ ଅଭିଯୋଗ ଦାଖଲ କରାଯାଇଥିଲା। ସେମାନଙ୍କ ମଧ୍ୟରେ ଲରେନ୍ସ ବିଶ୍ନୋଇ ଏବଂ ଗୋଲ୍ଡି ବ୍ରାରଙ୍କ ସହ ଜଡିତ ଗ୍ୟାଙ୍ଗର ସଦସ୍ୟ ମଧ୍ୟ ସାମିଲ ଅଛନ୍ତି। ଏଫବିଆଇ ଅନୁଯାୟୀ, ବିଶ୍ନୋଇ ଗ୍ୟାଙ୍ଗର ନେଟୱାର୍କ ଅନେକ ଦେଶରେ ବ୍ୟାପିଛି।
ପୂର୍ବରୁ ନଭେମ୍ବର ୧୯ ତାରିଖରେ କାନାଡାର ବୋଲୋ ପ୍ରୋଗ୍ରାମ ଦେଶର ୨୫ ଜଣ ମୋଷ୍ଟ ୱାଣ୍ଟେଡ୍ ପଳାତକଙ୍କ ଏକ ନୂତନ ତାଲିକା ପ୍ରକାଶ କରିଥିଲା। ସେଥିରେ ଗୋଲ୍ଡି ବ୍ରାରଙ୍କୁ ତାଲିକାର ଶୀର୍ଷରେ ରଖାଯାଇଥିଲା। ୱିନିପେଗ ପୁଲିସ ୨୦ ସେପ୍ଟେମ୍ବର ୨୦୨୩ରେ ଘଟିଥିବା ସୁଖଦୁଲ ସିଂହ ଗିଲ୍ ଓରଫ ସୁଖା ଦୁନେକେଙ୍କ ହତ୍ୟା ମାମଲାରେ ଗୋଲ୍ଡିଙ୍କୁ ଖୋଜୁଛି।

କାନାଡା ସରକାର ସେପ୍ଟେମ୍ବର ୨୦୨୫ରେ ଲରେନ୍ସ ବିଶ୍ନୋଇ ଗ୍ୟାଙ୍ଗକୁ ଏକ ଆତଙ୍କବାଦୀ ସଂଗଠନ ଭାବରେ ନାମିତ କରିଥିଲେ। କାନାଡିୟ କର୍ତ୍ତୃପକ୍ଷଙ୍କ ଅନୁଯାୟୀ, ଏହି ଗ୍ୟାଙ୍ଗ ଭାରତୀୟ ବଂଶୋଦ୍ଭବ ଏବଂ ଅନ୍ୟ ସମ୍ପ୍ରଦାୟର ଲୋକଙ୍କ ମଧ୍ୟରେ ହିଂସା, ଧମକ ଏବଂ ଆଦାୟ ମାଧ୍ୟମରେ ଭୟର ବାତାବରଣ ସୃଷ୍ଟି କରିବାର ଅଭିଯୋଗ ରହିଛି। ଗୋଲ୍ଡି ବ୍ରାରଙ୍କ ବିରୋଧରେ ଭାରତରେ ମଧ୍ୟ ଅନେକ ଅପରାଧିକ ଅଭିଯୋଗ ରହିଛି। ଆମେରିକା ଏବଂ କାନାଡିୟ ଏଜେନ୍ସିଗୁଡ଼ିକର କାର୍ଯ୍ୟାନୁଷ୍ଠାନ ପରେ ତାଙ୍କ ପାଇଁ ଆନ୍ତର୍ଜାତୀୟ ସନ୍ଧାନ ଜୋରଦାର ହୋଇଛି।

What's Your Reaction?

like

dislike

love

funny

angry

sad

wow