ପୂର୍ବତନ ଅଗ୍ନିବୀରଙ୍କ ପାଇଁ ରହିବ ୧୦ ପ୍ରତିଶତ ସଂରକ୍ଷଣ ବ୍ୟବସ୍ଥା

ଅଗ୍ନିବୀରଙ୍କ ପାଇଁ କେନ୍ଦ୍ର ସରକାର କଲେ ବଡ଼ ଘୋଷଣା । ଏହି ଯୋଜନାକୁ ନେଇ ବିରୋଧୀ ଆରମ୍ଭରୁ ସରକାର ଉପରେ ଆକ୍ରମଣ କରିଆସୁଥିଲେ । ହେଲେ ଏହି ଯୋଜନାରେ ବର୍ତ୍ତମାନ ଏକ ବଡ଼ ପରିବର୍ତ୍ତନ କରାଯାଇଛି । ଏଣିକ CISF, BSF ଏବଂ RPF କନେଷ୍ଟବଳ ପୋଷ୍ଟ ପାଇଁ ପୂର୍ବତନ ଅଗ୍ନିବୀରଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିବ । ସେହିପରି ବୟସସୀମା ଓ ଶାରୀରିକ ପରୀକ୍ଷାରେ ମଧ୍ୟ ପୂର୍ବତନ ଅଗ୍ନିବୀର ଯବାନଙ୍କ ପାଇଁ କୋହଳ ବ୍ୟବସ୍ଥା ରହିବ । କେନ୍ଦ୍ର ସରକାର ଜୁନ୍ 2022ରେ ଅଗ୍ନିପଥ ନିଯୁକ୍ତି ଯୋଜନା ଆରମ୍ଭ କରିଥିଲେ। ଏହି ପ୍ରଣାଳୀ ଅଧୀନରେ ସଶସ୍ତ୍ର ବାହିନୀ ଚାରି ବର୍ଷ କାର୍ଯ୍ୟକାଳ ପାଇଁ 17 ରୁ 21 ବର୍ଷ ବୟସର ଯୁବକଙ୍କୁ ନିଯୁକ୍ତି ମିଳିଥାଏ । ନିଯୁକ୍ତି ଅଗ୍ନବୀରଙ୍କ ମଧ୍ୟରୁ 25 ପ୍ରତିଶତ ଯବାନଙ୍କ ଚାକିରି କାଳ ଆଉ 15 ବର୍ଷ ପାଇଁ ବଢାଯିବାର ବ୍ୟବସ୍ଥା ଥିବା ବେଳେ ଅବଶିଷ୍ଟ 75 ପ୍ରତିଶତ ଯବାନଙ୍କୁ କ୍ଷତିପୂରଣ ସହ ଅବସର ଦିଆଯିବ ।