ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଆଗକୁ ଆସିଲେ ବିରୋଧ. ତୁରନ୍ତ ଇସ୍ତଫା ସହ ଜ୍ଞାନେଶ କୁମାରଙ୍କ ଗିରଫ ଦାବି

ବାସ୍ତବରେ ନିର୍ବାଚନ କମିଶନ ମୁଖ୍ୟ ନିର୍ବାଚନ କମିଶନର ଏବଂ ଦୁଇ ନିର୍ବାଚନ କମିଶନରଙ୍କୁ ନେଇ ଗଠିତ ଏକ ମିଳିତ ସଂସ୍ଥା।

ଏଭଳି ସ୍ଥିତିରେ ଯଦି ଦୁଇ ନିର୍ବାଚନ କମିଶନରଙ୍କ ଆପତ୍ତିକୁ ଅଣଦେଖା କରାଯାଇଥିବା ଦାବି ସତ ହୁଏ, ତେବେ ପ୍ରଶ୍ନ ଉଠୁଛି ଯେ, ଗୁରୁତ୍ୱପୂର୍ଣ୍ଣ ନିଷ୍ପତ୍ତି କ’ଣ କେବଳ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ସ୍ତରରେ ହିଁ ନିଆଯାଉଥିଲା? 

 ସ୍ପେଶାଲ୍ ଇଣ୍ଟେନସିଭ୍ ରିଭିଜନ୍‌  ପ୍ରକ୍ରିୟାକୁ ନେଇ ନିର୍ବାଚନ କମିଶନ ଭିତରେ ହିଁ କ’ଣ ମତଭେଦ ରହିଛି? ଏହି ପ୍ରକ୍ରିୟାକୁ ନେଇ କ’ଣ ନିର୍ବାଚନ କମିଶନର ଟିମ୍ ବିଭାଜିତ ହୋଇଥିଲା? ଏଭଳି ପ୍ରଶ୍ନକୁ ନେଇ ଦେଶର ରାଜନୀତିରେ ନୂଆ ବିବାଦ ଦେଖାଦେଇଛି। ଏହାର କାରଣ ହେଉଛି ଏକ ଇଂରାଜୀ ଖବରକାଗଜର ରିପୋର୍ଟ। ରିପୋର୍ଟରେ ଦାବି କରାଯାଇଛି ଯେ, ଗତ ୧୦ ମାସ ମଧ୍ୟରେ ନିର୍ବାଚନ କମିଶନ ଏଭଳି ଅନେକ ନିଷ୍ପତ୍ତି ନେଇଛି, ଯେଉଁଥିରେ ନିର୍ବାଚନ କମିଶନର ସୁଖବୀର ସିଂହ ସାନ୍ଧୁ ଏବଂ ବିବେକ ଯୋଶୀ ସହମତ ନଥିଲେ।

ରିପୋର୍ଟ ଅନୁସାରେ, ଦୁଇ ନିର୍ବାଚନ କମିଶନର ଏସଆଇଆର୍‌ ସହ ଜଡ଼ିତ ଅନେକ ପରିବର୍ତ୍ତନ ଉପରେ ଆପତ୍ତି ଜଣାଇଥିଲେ। ଦାବି କରାଯାଇଛି ଯେ, ଗତ ୧୦ ମାସରେ ସେମାନେ ଅତିକମରେ ୧୪ ଥର ନିଜର ଅସହମତି ଦର୍ଜ କରିଥିଲେ। ତେବେ ସେଗୁଡ଼ିକ ଉପରେ କୌଣସି କାର୍ୟ୍ୟାନୁଷ୍ଠାନ ହୋଇନଥିଲା।

ବାସ୍ତବରେ ନିର୍ବାଚନ କମିଶନ ମୁଖ୍ୟ ନିର୍ବାଚନ କମିଶନର ଏବଂ ଦୁଇ ନିର୍ବାଚନ କମିଶନରଙ୍କୁ ନେଇ ଗଠିତ ଏକ ମିଳିତ ସଂସ୍ଥା। ଏଭଳି ସ୍ଥିତିରେ ଯଦି ଦୁଇ ନିର୍ବାଚନ କମିଶନରଙ୍କ ଆପତ୍ତିକୁ ଅଣଦେଖା କରାଯାଇଥିବା ଦାବି ସତ ହୁଏ, ତେବେ ପ୍ରଶ୍ନ ଉଠୁଛି ଯେ, ଗୁରୁତ୍ୱପୂର୍ଣ୍ଣ ନିଷ୍ପତ୍ତି କ’ଣ କେବଳ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ସ୍ତରରେ ହିଁ ନିଆଯାଉଥିଲା?

ରିପୋର୍ଟକୁ ନେଇ ବଢ଼ିଲା ବିବାଦ
ରିପୋର୍ଟ ଅନୁସାରେ, ଦୁଇ ନିର୍ବାଚନ କମିଶନରଙ୍କ ୧୪ଟି ଆପତ୍ତି ମଧ୍ୟରୁ ୪ଟି ପ୍ରସଙ୍ଗର ସିଧାସଳଖ ସମ୍ପର୍କ ନିର୍ବାଚନୀ ପ୍ରକ୍ରିୟା ସହ ଥିଲା। ଏଥିରେ ନୂଆ ଭୋଟରଙ୍କୁ ଯୋଡ଼ିବାରେ ନିୟମର କଥିତ ଅବହେଳା, ଭୋଟର ତାଲିକା ଉପରେ କେନ୍ଦ୍ରୀକୃତ ନିୟନ୍ତ୍ରଣ, ପଶ୍ଚିମବଙ୍ଗରେ ପ୍ରାୟ ୩୪ ଲକ୍ଷ ଭୋଟରଙ୍କ ନାମ ତାଲିକାରେ ରଖିବା ବିରୋଧରେ ଦାଖଲ ହୋଇଥିବା ଆବେଦନ ଏବଂ ଗୋଆରେ ୯୭ ଜଣ ଯୋଗ୍ୟ ଭୋଟରଙ୍କ ନାମ ପୁନର୍ବାର ଯୋଡ଼ା ନଯିବା ପ୍ରସଙ୍ଗ ସାମିଲ ଥିଲା।

ଯଦି ରିପୋର୍ଟରେ କରାଯାଇଥିବା ଦାବି ସତ ହୁଏ, ତେବେ ବିରୋଧୀ ଦଳ ପ୍ରଶ୍ନ ଉଠାଉଛନ୍ତି ଯେ, ଦେଶର ନିର୍ବାଚନୀ ପ୍ରକ୍ରିୟା କ’ଣ ଜଣେ ବ୍ୟକ୍ତିଙ୍କ ହାତରେ କେନ୍ଦ୍ରୀଭୂତ ହୋଇଯାଇଛି? ତେବେ ନିର୍ବାଚନ କମିଶନ ଏହି ଦାବିକୁ ଖାରଜ କରି କହିଛି ଯେ, ଯେକୌଣସି ସଂସ୍ଥାରେ ଭିନ୍ନ ମତ ଏବଂ ପରାମର୍ଶ ଦେବା ଏକ ସାଧାରଣ ପ୍ରକ୍ରିୟା। ଏହାକୁ ମତଭେଦ ଭାବେ ଦେଖିବା ଉଚିତ ନୁହେଁ। ତଥାପି ପ୍ରଶ୍ନ ଉଠୁଛି ଯେ, ଯଦି ଆପତ୍ତି ଦର୍ଜ ହୋଇଥିଲା, ତେବେ ସେଗୁଡ଼ିକ ଉପରେ କ’ଣ ବିଚାର କରାଯାଇଥିଲା ଏବଂ ଶେଷ ନିଷ୍ପତ୍ତି କେଉଁ ଆଧାରରେ ନିଆଯାଇଥିଲା। ଏହି ପ୍ରସଙ୍ଗ କେବଳ ନିର୍ବାଚନୀ ପ୍ରକ୍ରିୟାରେ ସୀମିତ ନୁହେଁ, ବରଂ ଗଣତାନ୍ତ୍ରିକ ସଂସ୍ଥାଗୁଡ଼ିକର କାର୍ୟ୍ୟପ୍ରଣାଳୀ ସହ ମଧ୍ୟ ଜଡ଼ିତ।

ବିରୋଧୀ ଦଳର ଆକ୍ରମଣ
ଏସଆଇଆର୍‌ ପ୍ରକ୍ରିୟାକୁ ନେଇ ପ୍ରଶ୍ନ ଉଠିବା ମଧ୍ୟରେ କଂଗ୍ରେସ ନେତା ରାହୁଲ ଗାନ୍ଧୀ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ଭିଡିଓ ସେୟାର କରି ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କୁ ଟାର୍ଗେଟ୍ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଯାହା କରାଯାଉଛି ତାହା ଭୁଲ୍ ଏବଂ ଦେଶର ସ୍ୱାର୍ଥ ବିରୋଧୀ। ରାହୁଲ ଗାନ୍ଧୀ କହିଛନ୍ତି, “ଭୋଟ୍ ଚୋରି ଭାରତର ଲୋକଙ୍କ ବିରୋଧରେ ଏକ ଅପରାଧ। ଏହା ଆମ ସମ୍ବିଧାନ ଉପରେ ସିଧାସଳଖ ଆକ୍ରମଣ। ଏହାକୁ କାର୍ୟ୍ୟକାରୀ କରୁଥିବା ବିଜେପି, ଆରଏସଏସ୍ ଏବଂ ନିର୍ବାଚନ କମିଶନ ଦେଶଦ୍ରୋହର କାମ କରିଛନ୍ତି। ନ୍ୟାୟ ନିଶ୍ଚିତ ମିଳିବ।”

ସୁପ୍ରିମକୋର୍ଟ ନିଜ ଆଡ଼ୁ ମାମଲା ନେବା ଉଚିତ: କପିଲ ସିବଲ
ପୂର୍ବତନ କେନ୍ଦ୍ରମନ୍ତ୍ରୀ କପିଲ ସିବଲ କହିଛନ୍ତି ଯେ, ସୁପ୍ରିମକୋର୍ଟ ଏହି ମାମଲାକୁ ନିଜ ଆଡ଼ୁ ନେଇ ସମ୍ପୂର୍ଣ୍ଣ ଘଟଣାର ତଦନ୍ତ କରିବା ଉଚିତ। ସେହିପରି ବିଜେପି ମୁଖ୍ୟ ନିର୍ବାଚନ କମିଶନରଙ୍କ ସମର୍ଥନରେ କହିଛି ଯେ, ଯେକୌଣସି ଗଣତାନ୍ତ୍ରିକ ସଂସ୍ଥାରେ ମତଭେଦ ସ୍ୱାଭାବିକ ଏବଂ ଏହାକୁ ସଙ୍କଟ ଭାବେ ଦେଖିବା ଉଚିତ ନୁହେଁ।

ଗଣତନ୍ତ୍ର ପାଇଁ ଚିନ୍ତାଜନକ: ଅଖିଳେଶ ଯାଦବ
ବିଜେପି କଂଗ୍ରେସ ଉପରେ ପାଲଟା ଆକ୍ରମଣ କରି କହିଛି ଯେ, ନିର୍ବାଚନୀ ଜାଲିଆତି ଏବଂ ସଂସ୍ଥାଗୁଡ଼ିକର ଅପବ୍ୟବହାରର ଇତିହାସ କଂଗ୍ରେସ ସହ ଜଡ଼ିତ। ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କହିଛନ୍ତି ଯେ, ଯଦି ଏଭଳି ଅଭିଯୋଗ ସତ ହୁଏ, ତେବେ ଏହା ଗଣତନ୍ତ୍ର ପାଇଁ ଚିନ୍ତାଜନକ ଏବଂ ନିର୍ବାଚନ କମିଶନର ନିରପେକ୍ଷତା ଉପରେ ପ୍ରଶ୍ନ ଉଠିବ।

ଜ୍ଞାନେଶ କୁମାରଙ୍କ ବିରୋଧରେ କାର୍ୟ୍ୟାନୁଷ୍ଠାନ ଦାବି: ମମତା ବାନାର୍ଜୀ
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ କାର୍ୟ୍ୟାନୁଷ୍ଠାନ ଦାବି କରିଛନ୍ତି। ଏହି ପ୍ରସଙ୍ଗରେ ସାରା ଦେଶରେ ଆନ୍ଦୋଳନ କରାଯିବ ବୋଲି ସେ କହିଛନ୍ତି।

୩ ବର୍ଷ ପୁରୁଣା ଭୋଟର ତାଲିକା ଫେରାଇ ଦିଆଯାଉ: କେଜ୍ରିୱାଲ
ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି ପ୍ରସଙ୍ଗରେ କହିଛନ୍ତି ଯେ, ଗତ ୩ ବର୍ଷରେ ଭୋଟର ତାଲିକାରେ ଯେତେ ପରିବର୍ତ୍ତନ କରାଯାଇଛି, ସେଗୁଡ଼ିକୁ ରଦ୍ଦ କରି ୩ ବର୍ଷ ପୁରୁଣା ଭୋଟର ତାଲିକାକୁ ପୁନଃ ବହାଲ କରାଯାଉ।

ଗଣତନ୍ତ୍ରରେ ମନମାନି ଚାଲିପାରିବ ନାହିଁ: ଉଦ୍ଧବ ଠାକରେ
ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେ କହିଛନ୍ତି ଯେ, ଗଣତନ୍ତ୍ରରେ ମନମାନି ଚାଲିପାରିବ ନାହିଁ ଏବଂ ସଂସ୍ଥାଗୁଡ଼ିକର ନିରପେକ୍ଷତା ବଜାୟ ରହିବା ଆବଶ୍ୟକ। କଂଗ୍ରେସ ନେତା ମନୀଷ ତିୱାରୀ କହିଛନ୍ତି ଯେ, ନିର୍ବାଚନ କମିଶନ ଭିତରେ ନିଷ୍ପତ୍ତି ନେବାର ପ୍ରକ୍ରିୟା କିଭଳି କାର୍ୟ୍ୟ କରୁଛି, ତାହା ଏକ ଗମ୍ଭୀର ପ୍ରଶ୍ନ।

ସମୟ ସହ ନିର୍ବାଚନ କମିଶନ ଉପରେ ଭରସା କମିଛି: ଓୱେସୀ
ଏଆଇଏମଆଇଏମ୍ ମୁଖ୍ୟ ଅସଦୁଦ୍ଦିନ ଓୱେସୀ ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ଦେଇ କହିଛନ୍ତି ଯେ, ଦିନେ ଦେଶର ଅଧିକାଂଶ ଲୋକ ନିର୍ବାଚନ କମିଶନ ଉପରେ ସମ୍ପୂର୍ଣ୍ଣ ଭରସା କରୁଥିଲେ, କିନ୍ତୁ ସମୟ ସହ ସେହି ଭରସା କମିଛି। ସେ ‘ଏକ୍ସ’ରେ ପୋଷ୍ଟ କରି ପ୍ରଶ୍ନ କରିଛନ୍ତି ଯେ, ଯଦି କମିଶନର ଅଧିକାଂଶ ସଦସ୍ୟ କୌଣସି ନିଷ୍ପତ୍ତିରେ ସହମତ ନଥିଲେ, ତେବେ ଏଭଳି ନିଷ୍ପତ୍ତିର ଆଇନଗତ ବୈଧତା ଉପରେ ପ୍ରଶ୍ନ ଉଠିବା ସ୍ୱାଭାବିକ।

ଯୋଗେନ୍ଦ୍ର ଯାଦବ ମଧ୍ୟ ଉଠାଇଲେ ପ୍ରଶ୍ନ
ଯୋଗେନ୍ଦ୍ର ଯାଦବ ଏହି ସମଗ୍ର ପ୍ରସଙ୍ଗରେ କହିଛନ୍ତି ଯେ, ଆଜିର ଖବର କେବଳ ଏହା ନୁହେଁ ଯେ ନିର୍ବାଚନ କମିଶନରମାନଙ୍କ ମଧ୍ୟରେ ଏସଆଇଆର୍‌କୁ ନେଇ ଗମ୍ଭୀର ଅସହମତି ଥିଲା। ବଡ଼ ପ୍ରଶ୍ନ ହେଉଛି, ଯଦି ଦୁଇ ନିର୍ବାଚନ କମିଶନର ଏହି ନିଷ୍ପତ୍ତିଗୁଡ଼ିକୁ ଭୁଲ୍ କିମ୍ବା ବେଆଇନ ବୋଲି ମନେ କରୁଥିଲେ, ତେବେ ସେଗୁଡ଼ିକୁ ରୋକିବା ପାଇଁ ସେମାନେ କ’ଣ କରିଥିଲେ? କେବଳ ନିରବରେ ଅସହମତି ଦର୍ଜ କରିବା ଯଥେଷ୍ଟ ଥିଲା କି? ନା ଏହା ମଧ୍ୟ ଉତ୍ତରଦାୟିତ୍ୱର ପ୍ରଶ୍ନ?
ବର୍ତ୍ତମାନ ରିପୋର୍ଟରେ କରାଯାଇଥିବା ଦାବି ଏବଂ ନିର୍ବାଚନ କମିଶନଙ୍କ ଜବାବ ମଧ୍ୟରେ ଏହି ବିବାଦ ରାଜନୈତିକ ଓ ସାମ୍ବିଧାନିକ ଆଲୋଚନାର ବିଷୟ ହୋଇଛି। ନିର୍ବାଚନ କମିଶନର କହିବା ଅନୁସାରେ, ସଂସ୍ଥା ଭିତରେ ଆଲୋଚନା ଏବଂ ଭିନ୍ନ ମତ ଗଣତାନ୍ତ୍ରିକ ପ୍ରକ୍ରିୟାର ଏକ ଅଂଶ। ଅନ୍ୟପକ୍ଷରେ ବିରୋଧୀ ଦଳ ଏହି ପ୍ରସଙ୍ଗରେ ଅଧିକ ସ୍ୱଚ୍ଛତା ଓ ଉତ୍ତରଦାୟିତ୍ୱ ଦାବି କରୁଛନ୍ତି।

ଆପ୍ ନେତା ମନୀଷ ସିସୋଦିଆ ମାଗିଲେ ଇସ୍ତଫା
ଆପ୍ ନେତା ମନୀଷ ସିସୋଦିଆ ମୁଖ୍ୟ ନିର୍ବାଚନ କମିଶନରଙ୍କ ଇସ୍ତଫା ଦାବି କରିଛନ୍ତି। ସେ ‘ଏକ୍ସ’ରେ ପୋଷ୍ଟ କରି କହିଛନ୍ତି— “ଜ୍ଞାନେଶ କୁମାର ଇସ୍ତଫା ଦିଅ।”

ମହୁଆ ମୋଇତ୍ରାଙ୍କ ବୟାନ
ଟିଏମ୍‌ସି ସାଂସଦ ମହୁଆ ମୋଇତ୍ରା ଅତ୍ୟନ୍ତ ତୀବ୍ର ଭାଷାରେ ଜ୍ଞାନେଶ କୁମାରଙ୍କୁ ସମାଲୋଚନା କରିଛନ୍ତି। ସେ କହିଛନ୍ତି, “ଜ୍ଞାନେଶ ‘ଦେଶଦ୍ରୋହୀ’ କୁମାରଙ୍କର ଏତେ ସାହସ ଯେ ସେ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କୁ ଭୋଟ୍ ଚୋରି ମାମଲାରେ କ୍ଷମା ମାଗିବାକୁ କିମ୍ବା ହଲଫନାମା ଦାଖଲ କରିବାକୁ କହିଛନ୍ତି। ଜ୍ଞାନେଶ, ତୁମେ ଚୋର। ଏବେ ଯେତେବେଳେ ଏହା ପ୍ରମାଣିତ ହୋଇସାରିଛି, ତେବେ ତୁମେ ଦେଶବାସୀଙ୍କୁ କ୍ଷମା ମାଗି ଇସ୍ତଫା କାହିଁକି ଦେଉନାହଁ?”