‘ଚିଟିଂ’ ପାଇଁ ନୁହେଁ ବିକ୍ଷୋଭ! ସାହିଲଙ୍କ ମୃତ୍ୟୁ ପରେ IIT ବମ୍ବେ ଛାତ୍ରଙ୍କ ସ୍ପଷ୍ଟୀକରଣ

IIT ବମ୍ବେ ଛାତ୍ରଙ୍କ ସ୍ପଷ୍ଟୀକରଣ—ବିକ୍ଷୋଭ ଚିଟିଂ ସମର୍ଥନ ପାଇଁ ନୁହେଁ। ସାହିଲଙ୍କ ମୃତ୍ୟୁ ପରେ ଛାତ୍ର କଲ୍ୟାଣ, ଜବାବଦେହିତା ଓ ଅନୁଷ୍ଠାନିକ ସଂସ୍କାର ଦାବିରେ ଆନ୍ଦୋଳନ ହୋଇଥିବା କହିଲେ ପ୍ରତିନିଧି।

ଛାତ୍ରମାନେ କହିଛନ୍ତି, ସେମାନଙ୍କ ବିକ୍ଷୋଭ କୌଣସି ପ୍ରକାରର ଚିଟିଂ କିମ୍ବା ଏକାଡେମିକ୍ ଅନିୟମିତତାକୁ ସମର୍ଥନ କରିବା ପାଇଁ ନୁହେଁ । ବରଂ ସାହିଲଙ୍କ ମୃତ୍ୟୁ ପରେ ଅନୁଷ୍ଠାନର ବ୍ୟବସ୍ଥା, ଛାତ୍ର କଲ୍ୟାଣ, ମାନସିକ ସ୍ୱାସ୍ଥ୍ୟ ସହାୟତା ଓ ପ୍ରଶାସନିକ ଦାୟିତ୍ୱକୁ ନେଇ ଉଠିଥିବା ପ୍ରଶ୍ନର ସମାଧାନ ଦାବିରେ ଆନ୍ଦୋଳନ ହୋଇଥିଲା । 

ଘଟଣା କ’ଣ?

ସେପ୍ଟେମ୍ବର ୧୮ରେ IIT ବମ୍ବେର ଦ୍ୱିତୀୟ ବର୍ଷର ଛାତ୍ର ସାହିଲ ୱାକୋଡେଙ୍କ ମୃତ୍ୟୁ ହୋଇଥିଲା । ଏହା ପୂର୍ବରୁ ଏକ ପରୀକ୍ଷା ସମୟରେ ତାଙ୍କ ପାଖରେ ମୋବାଇଲ୍ ଥିବା ଏବଂ ପ୍ରଶ୍ନପତ୍ରକୁ ChatGPTରେ ଅପଲୋଡ୍ କରିଥିବା ନେଇ IIT ବମ୍ବେ ପକ୍ଷରୁ କୁହାଯାଇଥିଲା । ତେବେ ପରେ ସଂସ୍ଥା ନିଜ ପୂର୍ବ ବୟାନ ପାଇଁ ଦୁଃଖ ପ୍ରକାଶ କରି, ତଦନ୍ତ ଶେଷ ହେବା ପୂର୍ବରୁ ଘଟଣା ସମ୍ପର୍କରେ କୌଣସି ନିଷ୍କର୍ଷରେ ପହଞ୍ଚିବା ଉଚିତ ନୁହେଁ ବୋଲି କହିଛି । 

ଏହାପରେ କ୍ୟାମ୍ପସରେ ଲଗାତାର ତିନି ଦିନ ଧରି ଛାତ୍ରମାନେ ବିକ୍ଷୋଭ କରିଥିଲେ । ସେମାନେ ଇନ୍‌ଷ୍ଟିଚ୍ୟୁସନାଲ୍ ଆକାଉଣ୍ଟାବିଲିଟି, ଛାତ୍ର ପ୍ରତିନିଧିତ୍ୱ, ମାନସିକ ସ୍ୱାସ୍ଥ୍ୟ ଓ ମେଡିକାଲ୍ ସପୋର୍ଟ ସହ ବିଭିନ୍ନ ସଂସ୍କାର ଦାବି ଉଠାଇଥିଲେ। ଛାତ୍ରମାନେ ଏକ ୧୮-ଦଫା ଦାବିପତ୍ର ମଧ୍ୟ ଦେଇଥିବା ରିପୋର୍ଟ ରହିଛି । 

ପ୍ରଫେସର ଦୁଲ୍ଲାଙ୍କୁ ନେଇ ଛାତ୍ରଙ୍କ ସ୍ପଷ୍ଟୀକରଣ

ଏହି ମାମଲାରେ ପ୍ରଫେସର ସୂର୍ଯ୍ୟନାରାୟଣ ଦୁଲ୍ଲାଙ୍କ ଭୂମିକାକୁ ନେଇ ମଧ୍ୟ ଚର୍ଚ୍ଚା ହୋଇଥିଲା । ଛାତ୍ର ପ୍ରତିନିଧିମାନେ କହିଛନ୍ତି, ସେମାନେ କେବେବି ଦୁଲ୍ଲାଙ୍କୁ ଦୋଷୀ ବୋଲି ଧରିନେଇ ଆନ୍ଦୋଳନ କରିନଥିଲେ । ସେମାନଙ୍କ ଦାବି ଥିଲା, ତଦନ୍ତ ଚାଲିଥିବା ସମୟରେ ଦୁଲ୍ଲାଙ୍କୁ Dean of Administrative Affairs ପଦରୁ ହଟାଯାଉ, ଯାହାଦ୍ୱାରା ତଦନ୍ତ ନିରପେକ୍ଷ ଭାବେ ହୋଇପାରିବ । ସୋମବାର IIT ବମ୍ବେ ତାଙ୍କୁ ଡିନ୍ ପଦରୁ ହଟାଇଛି, କିନ୍ତୁ ସେ ପ୍ରଫେସର ଭାବେ ରହିଛନ୍ତି ।
  
ଜାତିଗତ ଭେଦଭାବ ଅଭିଯୋଗ

ଅନ୍ୟପଟେ, ସାହିଲଙ୍କ ପରିବାର ପକ୍ଷରୁ ଜାତିଗତ ଭେଦଭାବ ଓ ନିର୍ଯାତନାର ଅଭିଯୋଗ ମଧ୍ୟ ଆସିଛି । ତାଙ୍କ ବାପାଙ୍କ ଅଭିଯୋଗ ଆଧାରରେ ପୁଲିସ ମାମଲା ରୁଜୁ କରିଛି ଏବଂ ତଦନ୍ତ Crime Branchକୁ ଦିଆଯାଇଥିବା ରିପୋର୍ଟ ରହିଛି । ଏହି ଅଭିଯୋଗଗୁଡ଼ିକ ଏବେ ତଦନ୍ତାଧୀନ ।

ଛାତ୍ରଙ୍କ ଆଉ ଏକ ବଡ଼ କଥା

ଛାତ୍ର ପ୍ରତିନିଧିମାନେ ସ୍ପଷ୍ଟ କରିଛନ୍ତି ଯେ, ସାହିଲଙ୍କ ମୃତ୍ୟୁକୁ ନେଇ ଉଠୁଥିବା ପ୍ରଶ୍ନ ଛାତ୍ରମାନଙ୍କ ନେତୃତ୍ୱରେ ହିଁ ରହିବା ଉଚିତ । ବାହାରର ରାଜନୈତିକ କିମ୍ବା ଅନ୍ୟ ସଂଗଠନ ଏହି ପ୍ରସଙ୍ଗକୁ ନିଜ ନାରେଟିଭ୍ ପାଇଁ ବ୍ୟବହାର ନକରନ୍ତୁ ବୋଲି ସେମାନେ କହିଛନ୍ତି ।