ଗୁଗ୍‌ଲ୍‌ରେ ଭିନେଶ୍‌ଙ୍କୁ ସର୍ବାଧିକ ସର୍ଚ୍ଚ କରିଛନ୍ତି ଲୋକେ

୨୦୨୪ରେ ଗୁଗଲରେ ସର୍ବାଧିକ ସର୍ଚ୍ଚ କରାଯାଇଥିବା ଭାରତୀୟ ତାଲିକାରେ କ୍ରୀଡା ତାରକାମାନେ କରିଛନ୍ତି ପ୍ରାଧାନ୍ୟ ବିସ୍ତାର। କୌଣସି ରାଜନେତା କିମ୍ବା କୌଣସି ଚଳଚ୍ଚିତ୍ର ତାରକା କିମ୍ବା ବ୍ୟବସାୟୀ ଏହି ତାଲିକାରେ ଶୀର୍ଷରେ ରହି ନାହାଁନ୍ତି। ଶ୍ରେଷ୍ଠ ୧୦ ଜଣରୁ ପାଞ୍ଚ ଜଣ ଖେଳାଳି ଅନ୍ତର୍ଭୁକ୍ତ ଅଛନ୍ତି, କିନ୍ତୁ ଆଶ୍ଚର୍ଯ୍ୟଜନକ କଥା ହେଲା ବିରାଟ କୋହଲି ଏବଂ ରୋହିତ ଶର୍ମା କିମ୍ବା ଏମଏସ ଧୋନୀଙ୍କ ପରି ବଡ କ୍ରିକେଟ ତାରକା ଏହି ତାଲିକାରୁ ବାଦ ପଡିଛନ୍ତି।ବହୁ ଖୋଜା ଯାଇଥିବା ଭାରତୀୟ ତାଲିକାରେ ମହିଳା ରେସଲର ଭିନେଶ ଫୋଗେଟ ଅଛନ୍ତି ଶୀର୍ଷରେ। ପ୍ୟାରିସ ଅଲିମ୍ପିକ୍ସ ୨୦୨୪ରେ ଭିନେଶ ଚମତ୍କାର ପ୍ରଦର୍ଶନ କରି ଫାଇନାଲରେ କରିଥିଲେ ପ୍ରବେଶ। ତେବେ ଫାଇନାଲ ମ୍ୟାଚ ପୂର୍ବରୁ ଓଜନ ସମସ୍ୟା ହେତୁ ତାଙ୍କୁ କରାଯାଇଥିଲା ଅଯୋଗ୍ୟ ଘୋଷିତ, ଯାହା ତାଙ୍କ ତଥା ତାଙ୍କ ପ୍ରଶଂସକଙ୍କ ପାଇଁ ଥିଲା ଏକ ବଡ଼ ଝଟକା। ଏହା ପରେ ଭିନେଶ ରାଜନୀତିରେ ପ୍ରବେଶ କରି ହରିୟାଣାର ଜୁଲାନା ବିଧାନସଭା ଆସନ ଜିତି ଜଣେ ବିଧାୟକ ହୋଇଥିଲେ। ଏହା ସତ୍ତ୍ୱେ ତାଙ୍କର ସଫଳତା ତାଙ୍କୁ ଗୁଗ୍‌ଲରେ ସର୍ବାଧିକ ସର୍ଚ୍ଚ କରାଯାଇଥିବା ବ୍ୟକ୍ତିଙ୍କ ତାଲିକାର ଶୀର୍ଷକୁ ନେଇଛି।କ୍ରୀଡ଼ା ବ୍ୟକ୍ତିଙ୍କ ଦୃଷ୍ଟିରୁ ଭାରତୀୟ କ୍ରିକେଟର ହାର୍ଦ୍ଦିକ ପାଣ୍ଡ୍ୟା ଏହି ତାଲିକାରେ ଦ୍ୱିତୀୟ ସ୍ଥାନରେ ଅଛନ୍ତି। ଚଳିତ ବର୍ଷ ଆଇପିଏଲରେ ହାର୍ଦ୍ଦିକ ମୁମ୍ବାଇ ଇଣ୍ଡିଆନ୍ସକୁ ଅଧିନାୟକ କରିଥିଲେ ଏବଂ ଟି-୨୦ ବିଶ୍ୱକପ ୨୦୨୪ ଜିତିବାରେ ଭାରତରେ ଗ୍ରହଣ କରିଥିଲେ ଏକ ଗୁରୁତ୍ୱପୂର୍ଣ୍ଣ ଭୂମିକା। ଶ୍ରେଷ୍ଠ ୧୦ରେ ଅନ୍ତର୍ଭୁକ୍ତ ଅନ୍ୟାନ୍ୟ ନାମ ରାଜନେତା ନୀତୀଶ କୁମାର ଏବଂ ଚିରାଗ ପାସୱାନ, ଅଭିନେତା ପୱନ କଲ୍ୟାଣ, ପୁଣମ ପାଣ୍ଡେ ଏବଂ ରାଧିକା ମର୍ଚ୍ଚାଣ୍ଟ ଅନ୍ତର୍ଭୁକ୍ତ।୨୦୨୪ରେ କ୍ରୀଡା ସହ ଜଡିତ ସବୁଠାରୁ ଟ୍ରେଣ୍ଡିଂ ସର୍ଚ୍ଚଗୁଡ଼ିକ ହେଲା ଇଣ୍ଡିଆନ ପ୍ରିମିୟର ଲିଗ ଏବଂ ଟି-୨୦ ବିଶ୍ୱକପ। ଏହି ଦୁଇଟି ଘଟଣା ଭାରତୀୟ ପ୍ରଶଂସକଙ୍କ ମଧ୍ୟରେ ବେଶ୍‌ ଲୋକପ୍ରିୟତା ହାସଲ କରିଥିଲା। ଏଥି ସହିତ, ପ୍ୟାରିସ ଅଲିମ୍ପିକ୍ସ ୨୦୨୪ ଗୁଗ୍‌ଲରେ ସର୍ବାଧିକ ସର୍ଚ୍ଚ କରାଯାଇଥିବା ବିଷୟ ମଧ୍ୟରେ ପାଇଛି ପଞ୍ଚମ ସ୍ଥାନ।